ELM VƏ TƏHSİL
REGİONAL ELMİ PROBLEMLƏR MÜZAKİRƏ EDİLMİŞDİR
Gəncə Regional Elm Mərkəzi müasir şəraitdə necə fəaliyyət göstərir, hansı elmi problemlərin həlli ilə məşğul olur? Azərbaycan Milli Elmlər Akademiyası Rəyasət heyətinin Gəncədə keçirilmiş səyyar iclasında bu və digər məsələlərdən ətraflı söhbət getmişdir.
AMEA-nın prezidenti, akademik Mahmud Kərimov Mərkəzin qarşısında duran həlli vacib məsələlərdən danışmış, elmi tədqiqatların istiqamətləri barədə mülahizələrini söyləmişdir.
Gəncə Regional Elm Mərkəzindən AZƏRTAC-a bildirmişlər ki, elmi tədqiqat institutları rəhbərlərinin, alimlərin və mütəxəssislərin iştirakı ilə keçirilən tədbirdə AMEA-nın akademikləri Məmmədtağı Cəfərovun, Siddiqə Məmmədovanın, professor Mübariz Yusifovun, Mərkəzin direktoru Fuad Əliyevin regionun təbii ehtiyatları, flora və faunası, onlardan səmərəli istifadə olunması, habelə ekoloji vəziyyəti barədə məlumatları dinlənilmiş, elmi araşdırmalar barədə fikir mübadiləsi aparılmışdır.
İclasdan əvvəl Gəncə Regional Elm Mərkəzinin binası qarşısında Azərbaycanın görkəmli elm və mədəniyyət xadimlərinin abidə kompleksinin açılışı olmuşdur.