“Rəqəmsal memarlıq təsvirləri və sənədləşdirmə üsulları” mövzusunda təlimlərə yekun vurulub
Bakı, 10 avqust, AZƏRTAC
Ağstafa rayon Heydər Əliyev Mərkəzində AMEA Arxeologiya və Antropologiya İnstitutunun və Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin tabeliyində fəaliyyət göstərən “Keşikçidağ” Dövlət Tarix-Mədəniyyət qoruğunun təşkilatçılığı ilə “Rəqəmsal memarlıq təsvirləri və sənədləşdirmə üsulları” mövzusunda nəzəri və praktiki təlimlərin yekununa həsr edilmiş iclas keçirilib.
Arxeologiya və Antropologiya İnstitutundan AZƏRTAC-a bildirilib ki, tədbiri açan institutun direktoru tarix üzrə fəlsəfə doktoru, dosent Fərhad Quliyev Azərbaycanda elmin müasir tələblərə uyğun rəqəmsallaşdırılmasına xüsusi diqqət yetirildiyini bildirib. Vurğulayıb ki, Azərbaycan Prezidenti İlham Əliyevin müvafiq Sərəncamı ilə “Azərbaycan Respublikasında rəqəmsal inkişafın sürətləndirilməsinə dair 2026 – 2028-ci illər üçün Fəaliyyət Planı” təsdiq olunub. İyunun 29-da isə Birinci vitse-prezident Mehriban Əliyevanın sədrliyi ilə Azərbaycan Respublikasının Rəqəmsal İnkişaf Şurasının ilk iclası keçirilib.
Alim türk mütəxəssislərin iştirakı ilə təşkil olunmuş nəzəri və praktiki təlimlərin Azərbaycan arxeologiyasında rəqəmsal texnologiyaların tətbiqi baxımından böyük əhəmiyyət daşıdığını qeyd edib. Bildirib ki, təlimlərdə azərbaycanlı arxeoloqlar rəqəmsal təsvirlərin hazırlanması, 3D modelləşdirmə və sənədləşdirmə texnologiyaları üzrə yeni bilik və bacarıqlar əldə ediblər. Artıq bu biliklərə yiyələnmiş arxeoloqlarımız hər bir tədqiqat ərazisinin müasir tələblərə cavab verən rəqəmsal modelini yaradacaqlar. Direktor türk mütəxəssislərə - Ege Universitetinin doktoru Zafer Derinə, Manisa Celal Bayar Universitetinin tədqiqatçısı Şahin Menteşeyə, Türkiyə Mədəniyyət və Turizm Nazirliyinin mütəxəssisi Hilal Beydemirə, habelə “Keşikçidağ” Dövlət Tarix-Mədəniyyət Qoruğunun kollektivinə təşəkkürünü bildirib.
Daha sonra “Keşikçidağ” qoruğunun direktoru Musa Mursaquliyev çıxış edərək Mədəniyyət Nazirliyinin Mədəni İrsin Qorunması, İnkişafı və Bərpası üzrə Dövlət Xidmətinin abidələrdə aparılan tədqiqatlara böyük önəm verdiyini söyləyib. O, arxeoloji tədqiqatların rəqəmsallaşma işində dövlət qurumlarının və elmi tədqiqat müəssisələrinin birgə fəaliyyətinin yüksək nəticələrini qeyd edib.
Türk mütəxəssislər “Keşikçidağ” və “Qədim Şəmkir şəhəri” qoruqları ərazisindəki abidələrdə, həmçinin Gədəbəy rayonundakı Xarxar nekropolunda və Tovuz rayonundakı Göytəpə yaşayış məskənində aparılan tədqiqatlara əsasən, Azərbaycanda arxeologiya elminin böyük potensiala sahib olduğunu bildiriblər. Bu təlimlərin daha geniş vüsət alacağı, hər iki qardaş dövlətdə aparılan arxeoloji tədqiqatlarda elmi mübadilə çərçivəsində birgə əməkdaşlığın dərinləşməsinə böyük ümid bəslədikləri vurğulanıb.
Sonra türk mütəxəssislər təlimin təşkilatçılarına Türkiyənin qədim naxış üslubu ilə bəzədilmiş çini sinini hədiyyə ediblər.
Arxeologiya və Antropologiya İnstitutunun doktorantı Aqil Əliyev isə əldə olunan biliklərin qısa müddətdə arxeoloji çöl və kameral tədqiqatlarda tətbiqinin Azərbaycanın rəqəmsal arxeologiyasının beynəlxalq elm ictimaiyyətində layiqli təmsil olunması üçün geniş imkanlar yaradacağını bildirib.
Tədbirin rəsmi hissəsindən sonra türk təlimçilər abidələrin və qazıntı ərazilərinin 3D təsvirlərinin müxtəlif istiqamətlər üzrə emalı və tapıntıların LiDAR texnologiyası vasitəsilə üçölçülü təsvirlərinin yaradılması üzrə son nəzəri-praktiki təlimlərini keçiblər. Bununla da dörd gün davam etmiş “Rəqəmsal memarlıq təsvirləri və sənədləşdirmə üsulları” mövzusunda nəzəri və praktiki təlimlər başa çatıb.
Bölmənin digər xəbərləri
