Rəşad Şəkərov “Caspian Energy Club United Kingdom”un sədri vəzifəsinə təyin olunub
Bakı, 2 fevral, AZƏRTAC
Rəşad Şəkərov “Caspian Energy Club United Kingdom”un sədri vəzifəsinə təyin olunub.
AZƏRTAC xəbər verir ki, bu barədə “Caspian Energy Club International”ın İdarəedici direktoru Günel Quliyeva bildirib.
Onun sözlərinə görə, Rəşad Şəkərov Böyük Britaniya ərazisində “Caspian Energy Club”un maraqlarını təmsil edərək, klubun müxtəlif layihələrini idarə edəcək, habelə B2G və B2B forumlar, biznes-turlar, dəyirmi masalar, “CEO Breakfast” və “CEO Lunch” kimi tədbirlər təşkil edəcək.
Rəşad Şəkərov ona göstərilən yüksək etimada görə “Caspian Energy Club”un Ali Rəhbərliyinə öz minnətdarlığını bildirib. O qeyd edib ki, Azərbaycan və Böyük Britaniya sahibkarları arasında netvörkinqin genişləndirilməsində, ticari-iqtisadi əlaqələrin inkişafında aktiv iştirak edilməsində səylərini əsirgəməyəcək.
Rəşad Şəkərov 1979-cu ildə anadan olub.
1998-ci ildə Azərbaycan Dövlət Dəniz Akademiyasından məzun olub.
2013-2018-ci illərdə Londonda “Chartered Shipbrokers” İnstitutunda təhsil alıb və həmin institutun fəxri üzvüdür.
2021-ci ildə “World Maritime Universiteti”nin, “Yüksək Dəniz İdarəçiliyi” ixtisasi üzrə aspirantura pilləsini bitirib.
Hal-hazırda təhsilini Azərbaycan Respublikasının Prezidenti yanında Dövlət İdarəçilik Akademiyasında davam etdirir.
İş fəaliyyətinə 1998-ci ildə “Caspian Shipping Company”də quru yük gəmiləri, tankerlər və bərələrdə 3-cü və 2-ci məmur vəzifələri ilə başlayıb.
2004-cü ildə karyerasını İstanbulda yerləşən “Golden Ocean Maritime Co. Ltd.”, daha sonra isə Azərbaycan Dövlət Dəniz Administrasiyasında pasport şöbəsinin müdiri vəzifəsində davam etdirib.
2007-2017-ci illər arasında Rəşad Şəkərov Qazaxıstan, AGT regionu, Əbu-Dabidə “Caspian Mainport”, “Noble Denton”, BP, DNG GL, “Noble Denton Associates”, “Hyundai Engineering and Construction” kimi şirkətlərdə işləyib.
2017-2018-ci illərdə “Azerbaijan Marine and Engineering Consultants LTD.” şirkətində direktor vəzifəsində çalışıb.
2018-ci ildə “Blue Water Shipping” şirkətinin Qazaxıstandakı “Future Growth Project” (FGP) layihəsi üzrə İngiltərədən gələn gəmilərin qəbulu və beynəlxalq daşımalar üzrə superintendent (idarə edici rəhbər) vəzifəsində çalışıb.
2018-2019-cu illərdə “Caspian Marine Services B.V.” Azərbaycan filialının direktor müavini kimi fəaliyyət göstərib.
2019-2021-ci illər ərzində “Azerbaijan Caspian Shipping Company” QSC-də layihələrin idarə edilməsi departament rəisi vəzifəsində çalışıb.
2021-ci ildən etibarən “Azerbaijan Maritime Engineering and Construction” MMC şirkətinin sahibi və eyni zamanda, baş icraçı direktoru vəzifəsində fəaliyyətini davam etdirir.
“Caspian Energy Club” dünyanın 50 ölkəsindən 5000-dən çox şirkəti birləşdirən dinamik və inkişaf edən regional təşkilatdır. Biznes - hökumət dialoqunun fəal iştirakçısı olan “Caspian Energy Club”un əsas məqsədi Azərbaycanda və “Caspian Energy Club”un fəaliyyət göstərdiyi digər ölkələrdə investisiya və işgüzar mühitin yaxşılaşdırılmasından, həmçinin B2G, B2B və B2C formatlarında dialoqların stimullaşdırılmasından və onlarda fəal iştirak etməkdən ibarətdir.
Biznes-netvörkinq üçün beynəlxalq platforma olan “Caspian Energy Club” mütəmadi olaraq müxtəlif tədbirlər təşkil edir. Mənzil-qərargahı Bakıda yerləşən “Caspian Energy Club”un əsas fəaliyyəti Mərkəzi Dəhliz ölkələrini əhatə edir. Klubun, həmçinin Türkiyə, Gürcüstan, Özbəkistan, Qazaxıstan, Çexiya, Almaniya, Polşa, Qırğızıstan, Böyük Britaniya, Macarıstan, Latviya, Estoniya, Finlandiya, Avstriya, BƏƏ-də rəsmi nümayəndəlikləri, habelə dünyanın müxtəlif ölkələrində səlahiyyətli nümayəndələri var.
“Caspian Energy Club International” 2023-cü ildə “Caspian Energy Club”un beynəlxalq layihələrini idarə etmək məqsədi ilə yaradılmışdır. 5 il ərzində “Caspian Energy Club International” dünyanın 100 ölkəsində klubun fiziki ofislərini açmağı planlaşdırır. “Caspian Energy Club International”ın əsas funksiyalarından biri nümayəndələrin təyin olunmadığı ölkələrdə klubun fəaliyyətini idarə etmək, eləcə də bütün xarici nümayəndəliklər üçün ümumi strategiyanın formalaşdırılmasıdır.
Bölmənin digər xəbərləri
