Rotterdamda 28 May - Müstəqillik Günü təntənə ilə qeyd edilib
Rotterdam, 29 may, AZƏRTAC,
Niderlandda fəaliyyət göstərən “Ana Vətən” Avropa Azərbaycanlı Qadınlar Birliyinin (AAQB) təşkilatçılığı və Diasporla İş üzrə Dövlət Komitəsinin dəstəyi ilə Rotterdam şəhərində 28 May - Müstəqillik Günü və Məhəmməd Əmin Rəsulzadənin anadan olmasının 140 illiyi təntənəli şəkildə qeyd edilib.
AZƏRTAC xəbər verir ki, konfransda Azərbaycan və Türk diasporunun fəalları, azərbaycanlı tələbələr və Niderlandda yaşayan həmyerlilərimiz iştirak ediblər.
Azərbaycanın Dövlət Himninin səslənməsi ilə başlayan tədbirdə “Ana Vətən” Avropa Azərbaycanlı Qadınlar Birliyinin sədri Mayisə Agamirzəyeva bildirib ki, Azərbaycanın ərazi bütövlüyü və suverenliyi tam bərpa olunduqdan sonra 28 May - Respublika Gününü Vətəndən uzaqda fəxrlə qeyd edirlər.
Benilüks Azərbaycanlıları Konqresinin (BAK) sədri Elsever Məmmədov, Amsterdam Yunus Emre İnstitutunun rəhbəri Adil Akaltun çıxış edərək 1991-ci ildə müstəqilliyini bərpa edən Azərbaycanın keşməkeşli illər yaşadığından, dövlətçiliyi qoruyub saxlamaq üçün apardığı mübarizədən, Prezident İlham Əliyevin müdrik siyasətindən danışıblar.
M.Ə.Rəsulzadənin nəvəsi, rəssam Rəis Rəsulzadə tədbir iştirakçılarina videomüraciətlə təşəkkür edib.
Konfransda Azərbaycan Xalq Cümhuriyyəti və M.Ə.Rəsulzadə irsinin tədqiqatçısı, tarix elmləri doktoru, professor Nəsiman Yaqublu həmin dövrlə bağlı maraqlı tarixi məlumat verib. Nəsiman Yaqublu 106 il əvvəl Azərbaycanın müstəqillik uğrunda keçdiyi keşməkeşli yoldan, mayın 28-də müsəlman dünyasında ilk parlamentli demokratik dövlətin - Azərbaycan Xalq Cümhuriyyəti yaradılmasından, ömrü 23 ay sürən bir respublikanın çox qısa müddət ərzində dövlət, kimlik və demokratiya uğrunda gördüyü işlərdən və bu yolda Azərbaycan Xalq Cümhuriyyətinin vətənə bəxş etdiyi tarixi şəxsiyyətlərdən söz açıb.
Tədbirdə 28 May - Müstəqillik Günü ilə bağlı interaktiv bilik oyunu da keçirilib. Bilik oyununun qalibinə Nəsiman Yaqublunun Məhəmməd Əmin Rəsulzadəyə həsr etdiyi kitab hədiyyə olunub.
Müstəqillik Günü tədbiri konsert proqramı ilə davam edib və Azərbaycanın Əməkdar artisti Firuz Səxavət Azərbaycan musiqilərini ifa edib.
Bölmənin digər xəbərləri
