Rusiya telejurnalisti: Azərbaycanın Rusiyadan praktiki olaraq bircə xahişi var...
Moskva, 9 sentyabr, AZƏRTAC
Rusiya telejurnalisti, keçmiş siyasi şərhçi və Rusiya televiziyasının Birinci kanalının Vaşinqton bürosunun başçısı, MDU-nun professoru Vladimir Suxoy Rusiya-Azərbaycan münasibətlərinin bugünkü vəziyyətini “Moskva-Baku” portalına müsahibəsində təhlil edərək bildirib ki, Rusiya Azərbaycan ilə hərtərəfli əməkdaşlığa maraq göstərir. Onun sözlərinə görə, “Azərbaycan Rusiya ilə yaxınlaşmaq istəyini hər vasitə ilə nümayiş etdirir, amma son vaxtlar getdikcə daha çox polyarlaşan güc mərkəzləri arasında balansı və siyasi tarazlığı qoruyub saxlamaq istəyir”.
V.Suxoy hesab edir ki, Bakının prioritetləri yetərincə şəffafdır. Jurnalist deyib: “Azərbaycan bir çox sahələrdə bərabərhüquqlu əməkdaşlığın hər hansı variantını nəzərdən keçirməyə hazırdır, amma onun başlıca ümidi Moskvanın Dağlıq Qarabağ münaqişəsinin həllinə real köməyidir. Azərbaycanın Rusiyadan praktiki olaraq bircə xahişi var: işğal olunmuş ərazilərin azad edilməsi məqsədi ilə Kreml Ermənistana real təsir göstərsin. Sergey Lavrovun Bakıda Qarabağ münaqişəsinin nizama salınmasında irəliləyiş ilə bağlı bəzi bəyanatlarının ikibaşlı mənalarına görə, Moskvanın münaqişə edən tərəflərin dəstəkləmədiyi müəyyən yeni təklifləri var. Amma tərəqqi əldə ediləcəyinə möhkəm ümid və ümumi məxrəcə doğru güclü irəliləyiş var.
V.Suxoy əmindir ki, Qarabağ probleminin həlinin yalnız bir variantı var. Jurnalist deyib: “Bu variant ondan ibarətdir ki, Ermənistan öz qoşunlarını tamamilə çıxarır, “DQR” və ona bitişik yeddi rayon üzərində nəzarət Azərbaycana keçir. Bakıda bunu tələb edirlər”.
Rusiyalı telejurnalist qeyd edib ki, son vaxtlar ikitərəfli münasibətlər üçün səciyyəvi olan və Sergey Lavrovun Bakıya səfərinin ab-havasını müəyyən edən başlıca məsələ mehriban ünsiyyət, Rusiya ilə Azərbaycan arasında dialoqun səmərəli və uğurlu inkişafına istiqamət götürməkdir. Politoloq xatırladıb: “Qonağı salamlayan Azərbaycan Prezidenti İlham Əliyev deyib ki, RF Prezidenti Vladimir Putinin birinci Avropa Oyunlarının açılış mərasiminə Rusiya Günündə qatılması iki ölkə arasında münasibətlərin yüksək səviyyədə olmasının parlaq göstəricisidir. Sergey Lavrov isə İlham Əliyevə Vladimir Putinin ən səmimi salamını çatdırıb. Sergey Lavrovun nitqində formal protokol tonları əsla müşahidə olunmayıb. Nazir hətta özünün və İlham Əliyevin alma-materi olan MDBMİ-ni xatırladıb və inişil bu universitetin tarixində ilk dəfə onun məzunlarının görüşünün təşkil edilməsi təşəbbüsünə görə Azərbaycan liderinə ürəkdən təşəkkür edib”.
Builki yüksək səviyyəli ikitərəfli səfərlərdən və iki ölkənin xarici işlər nazirlərinin görüşlərindən danışan jurnalist bildirib ki, görüş və danışıqların gərgin cədvəli belə qənaətə gəlməyə imkan verir ki, tərəflər hər iki ölkə üçün dönüş xarakteri daşıyan ciddi məsələlərin müzakirəsi ilə məşğuldurlar. V.Suxoy deyib: “Başqa sözlə desək, yetərincə çoxdan formalaşan və demək olar ki, bütün sahələri, o cümlədən siyasi, iqtisadi, energetika, humanitar və hərbi sahələri əhatə edən bu səfərlər ölkələrimiz arasında strateji tərəfdaşlığın ən yaxşı indikatorudur. Azərbaycanın “Russia Arms Expo (RAE)-2015” sərgisinə dəvət olunması S.Lavrovun səfərinin mühüm məqamlarından biridir. “Russia Arms-2015” Beynəlxalq hərbi texnika və hərbi məhsullar sərgisi sentyabrın 9-dan 12-dək Nijni Tagildə keçiriləcək.
Rusiya Bakını Moskvanın inteqrasiya layihələrində görməyə şad olardı, amma bu ssenari üzərində israr etmir. V.Suxoy deyib: “S.Lavrov Azərbaycanın Avrasiya İttifaqına daxil olması perspektivləri barədə suala cavab verərək bildirib ki, Moskva tərəfdaşlarının Avrasiya məkanına maraq göstərməsinə həmişə sevinir. Amma son qərarı onların özü qəbul edir. Azərbaycanın seçiminə belə loyal münasibət göstərir ki, Rusiya Cənubi Qafqazdakı tərəfdaşına həqiqətən hörmətlə yanaşır və bir sıra aktual xarici-siyasi məsələlərə dair Bakının dəstəyini almağa çalışır”.
Rusiya XİN-in başçısının Bakıya səfəri zamanı tərəflər razılaşıblar ki, Azərbaycan ilə RF-nin qarşılıqlı münasibətləri mehriban və qonşuluq prinsiplərinə əsaslanır. Politoloq fikrini belə tamamlayıb: “Deməli, Bakı ilə Moskvanın qarşılıqlı fəaliyyət siyasəti bundan sonra da bəzi postsovet ölkələrinin Kreml ilə münasibətlərində bəzən çatışmayan balans, hörmət və başqa tərəfin rəyini nəzərə almaq prinsipləri üzərində qurulacaq”.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
