Rusiya və Azərbaycanın qarşılıqlı əməkdaşlığı MDB-nin digər dövlətləri üçün nümunə ola bilər
Moskva, 11 noyabr, AZƏRTAC
Tezliklə Müstəqil Dövlətlər Birliyinin yaranmasının 25 ili tamam olacaq. Moskvada keçirilən, AZƏRTAC-ın da media tərəfdaşlarından biri olduğu “MDB-nin 25 illiyi: qarşılıqlı anlaşma, əməkdaşlıq və inkişaf” Açıq Beynəlxalq Forumunda bu illər ərzində nələrin əldə olunduğu və postsovet ölkələrinin hansı ümumi problemlərinin qaldığı məsələlər müzakirə edilib.
MDB-nin yubileyi ərəfəsində birlik ölkələrini təmsil edən 500-dən çox nümayəndə Moskvada toplaşıb. İkigünlük tədbirin əsas məsələləri humanitar əməkdaşlıq, xalq diplomatiyası, din, elm və təhsil, innovasiya, biznes və digər fəaliyyət sahələrinin inkişafının yeni istiqamətləri idi. Məlum olub ki, bəzi dövlətlərin qonşularla həvəslə bölüşdüyü, artıq özünü doğrultmuş qarşılıqlı əməkdaşlıq sxemləri var.
Məsələn, İkinci Dünya müharibəsinin nəticələrinin yeni şərhi ilə bağlı vəziyyət ümumi bəladır. Qərb ölkələrinin siyasi intriqalarına uyğun olaraq bu nəticələrə yenidən baxılması təkcə Rusiyanın yox, həm də bütün MDB ölkələrinin maraqlarına toxunur. Çünki Böyük Qələbəyə keçmiş Sovet İttifaqının bütün xalqları töhfə verib. Buna görə də bu gün əsas vəzifə qəhrəmanlıq haqqında xatirələri, bilikləri qorumaq və gələcək nəsillərə ötürməkdir ki, qərəzli “tarixçilər” faktları təhrif edə bilməsinlər. Müzakirə iştirakçıları belə bir ümumi rəyə gəliblər ki, bu məsələdə mühüm rolu ictimai birliklər, mətbuat və təhsil oynayır. Məsələn, postsovet məkanında bütün məktəblərdə tədris ediləcək vahid tarix dərsliyi, eləcə də bu mövzuda yazan vahid KİV yaratmaq təklif olunub.
Yaddaşın qorunması işində uğur əldə etmək yalnız birlikdə mümkündür. Bütün postsovet ölkələri həqiqət uğrunda vahid cəbhə təşkil edərsə, bu, təhrif təbliğatını aradan qaldırmağa kömək edəcək. Belə sıx əməkdaşlığa Rusiya və Azərbaycan münasibətləri nümunə ola bilər.
Rusiya-Azərbaycan parlamentlərarası dostluq qrupunun rəhbəri Dmitri Savelyev deyib: “Qonşu ölkələrin hökumətləri də, ictimai birlikləri də tarixi faktların təhrifi ilə mübarizədə birləşmiş siyasət yürüdür. Birgə sərgilər, forumlar və festivallar, ümumi qələbəyə həsr olunan köhnə xatirə abidələrinin qorunması və yenilərinin açılması müharibə barədə gələcək nəsillərə xatirənin ötürülməsinə dair fəaliyyəti necə qurmaq lazım olduğuna bir nümunədir. Rostov vilayətində “Sambek yüksəklikləri” memorialı, faşistlərə qarşı savaşda bir çox azərbaycanlı döyüşçülərin həlak olduğu yer bir vaxtlar Heydər Əliyevin təşəbbüsü ilə yaradılıb. Bu yaxınlarda isə abidə Azərbaycan Prezidenti İlham Əliyevin hərtərəfli dəstəyi ilə yenilənib. Bu, ümumi tarixi yaddaşa həsr olunan birgə layihələrə dair dənizdə bir damladır”.
Bu gün MDB ölkələri qarşısında duran əsas vəzifə xalqlarımız arasında hörmət və dostluğu qoruyub saxlamaqdır. Forumun əksər iştirakçılarının fikrincə, xalq diplomatiyası MDB məkanında humanitar inteqrasiya proseslərinin aləti olmağa qadirdir. Burada yenə də Rusiya və Azərbaycanın müsbət təcrübəsi yaxşı əlaqələrə nümunə ola bilər.
Moskva Beynəlxalq Multikulturalizm Mərkəzinin rəhbəri Nataliya Krasovskaya deyib: “Məhz xalq diplomatiyası ölkələrimiz arasında dostluq və qarşılıqlı anlaşmanın təməli olub. Çünki ona heç bir maneə yoxdur, hissləri səmimi göstərir. Rəsmi kabinetlərdə diplomatik münasibətlər qurularkən dövlətlər arasında dərin və möhkəm münasibətlər adi insanlar tərəfindən yaradılır”.
Rus rəssamı Valeri Xaritonov xanım Krasovskaya ilə tam razıdır. O qeyd edir ki, dövlət ümumi aydın siyasi xətti müəyyən etməlidir, rəsmi siyasət və xalq diplomatiyası ona uyğun fəaliyyət göstərməlidir.
Moskva Dövlət Universitetinin Daşkənd filialının professoru Dövlətbek Sadullayevin rəyinə görə, xalq diplomatiyasının daha bir xüsusiyyəti onun yalnız əzmkarlıq əsasında mövcudluğundadır və hər hansı bir maliyyə qoyuluşundan asılı deyil. Forumun bütün iştirakçılarının ümumi rəyinə görə məhz bu fədakar səmimiyyət əsasında dövlətlər arasında münasibətlər qurulmalıdır.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
