Saatlıda “Pambıq səpininə hazırlıq və səpinin səmərəli təşkili” mövzusunda müşavirə keçirilib
Saatlı, 4 aprel, Mahir Babayev, AZƏRTAC
Aprelin 4-də Saatlıdakı Gənclər Mərkəzində “Pambıq səpininə hazırlıq və səpinin səmərəli təşkili” mövzusunda müşavirə keçirilib.
Müşavirədə Kənd Təsərrüfatı Nazirliyinin Bitkiçilik şöbəsinin, Kənd Təsərrüfatı Nazirliyi yanında Bitki Sortlarının Qeydiyyatı və Toxum Nəzarəti üzrə Dövlət Xidmətinin, Dövlət Fitosanitar Nəzarəti Xidmətinin, “Aqrolizinq” ASC-nin, Aqrar Elm və İnformasiya Məsləhət Mərkəzinin, Bitki Mühafizə və Texniki Bitkilər Elmi-Tədqiqat İnstitutunun, Azərbaycan Dövlət Aqrar Universitetinin, nazirliyin yerli strukturlarının, iri pambıqçılıq şirkətlərinin nümayəndələri, eləcə də fermer və sahibkarlar iştirak ediblər.
AZƏRTAC-ın bölgə müxbiri xəbər verir ki, tədbirdə pambıqçılığın inkişafı məsələlərinə dair Bərdədə keçirilən respublika müşavirəsində Prezident İlham Əliyevin nitqindən irəli gələn vəzifələrin icrası çərçivəsində görüləcək işlər müzakirə olunub.
Saatlı Rayon İcra Hakimiyyətinin başçısı Siraqəddin Cabbarov çıxış edərək ölkəmizdə aqrar sektorun inkişafı istiqamətində həyata keçirilən tədbirlərdən danışıb. Bildirilib ki, Saatlıda kənd təsərrüfatının kompleks inkişaf etdirilməsi ilə bağlı aparılan işlər gözəl nəticələr verir, rayonda kənd təsərrüfatının digər sahələri ilə yanaşı, ənənəvi sahə olan pambıqçılığın inkişafına da xüsusi diqqət yetirilir.
Siraqəddin Cabbarov Bərdədə pambıqçılığın inkişafı məsələlərinə həsr olunan respublika müşavirəsində Prezident İlham Əliyevin nitqindən irəli gələn konkret vəzifələrdən danışaraq qeyd edib ki, ötən il rayonda 17 min 220 hektar sahədə pambıq əkilib, 25 min 756 ton məhsul istehsal olunaraq qəbul məntəqələrinə təhvil verilib. Məhsuldarlıq isə 15 sentner olub. Bu il rayonda 16 min 820 hektar sahədə pambıq əkilməsi nəzərdə tutulub. Artıq 2645-dən çox torpaq mülkiyyətçisi ilə müqavilə bağlanılıb, çiyid səpiləcək sahələrdə keyfiyyətli şum aparılıb, digər aqrotexniki tədbirlər vaxtında həyata keçirilib. Sahələr və səpinə cəlb olunacaq texnika tam hazır vəziyyətə gətirilib.
Bildirilib ki, pambıq əkilməsi üçün nəzərdə tutulan 16 min 820 hektar torpaq sahəsinin 4840 hektarının MKT MMC, 3342 hektarının “CTS AQRO” MMC, qalanının isə “Kənd Təsərrüfatı” MMC, eləcə də rayon icra hakimiyyəti tərəfindən fərdi qaydada mülkiyyətçilərlə bağlanmış müqavilələr əsasında əkilməsi müəyyən edilib.
Müşavirədə çıxış edən kənd təsərrüfatı nazirinin müavini İlham Quliyev qeyd edib ki, bu gün aqrar sahənin inkişafına yüksək diqqət və qayğı göstərilir. Kənd təsərrüfatı məhsulları istehsalçıları vergilərdən azad edilib. Fermer və sahibkarlara güzəştli şərtlərlə kredit, toxum, gübrə, texnika, damazlıq mal-qara almaq imkanı yaradılıb. Əkin sahələrinin becərilməsində istifadə olunan yanacaq və motor yağlarına görə istehsalçılara hər hektar üçün 50 manat, buğda və çəltik istehsalçılarına isə əlavə olaraq daha 40 manat subsidiya verilir.
Diqqətə çatdırılıb ki, xam pambığın növlər üzrə alış qiymətləri artırıldığından torpaq mülkiyyətçiləri tərəfindən bu sahəyə maraq xeyli artıb. Nazirlər Kabinetinin qərarı ilə pambıq və tütün istehsalçılarına becərilən hər hektar əkin sahəsinə görə əlavə 40 manat yardım tətbiq edilib. Səpin, becərmə və yığım işlərinin mexanikləşdirilməsi, mütərəqqi texnologiyalar tətbiq edərək istehsalın səmərəliliyinin daha da artırılması üçün “Aqrolizinq” ASC tərəfindən dünyanın qabaqcıl şirkətlərinin istehsalı olan müasir texnika və avadanlıqlar respublikaya gətirilib. Bu istiqamətdə işlər davam etdirilir. Pambıqçılığın inkişafı həm əhalinin məşğulluğunun təmin edilməsi, gəlirlərinin artması, həm də ölkəyə valyuta gətirilməsi baxımdan əhəmiyyətlidir.
Nazir müavini çıxışında ölkənin ənənəvi kənd təsərrüfatı sahələrinin daha da inkişaf etdirilməsi, pambıqçılıqla yanaşı tütünçülüyün, baramaçılığın və heyvandarlığın inkişafı istiqamətində görülən işlərdən və qarşıda duran vəzifələrdən də danışıb.
Müşavirədə Kənd Təsərrüfatı Nazirliyi Aparatının Bitkiçilik şöbəsinin müdiri İmran Cümşüdov “Pambıqçılığın intensiv texnologiyalar əsasında becərilməsi”, “Aqrolizinq” ASC-nin sədri Elşən Məmmədov “Texnika və gübrə ilə təminatın vəziyyəti”, Bitki Sortlarının Qeydiyyatı və Toxum Nəzarəti üzrə Dövlət Xidmətinin rəisi Möhtəsim Əhmədov “Pambıq toxumu ilə təminatın vəziyyəti”, Dövlət Fitosanitar Nəzarət Xidmətinin rəisi Camal Quliyev “Pestisidlərlə təminatın vəziyyəti” barədə məruzələrlə çıxış ediblər.
Sonda iştirakçılarla qarşılıqlı fikir mübadiləsi aparılıb, pambıq səpininə hazırlıq və səpinin səmərəli təşkilinə dair müvafiq tövsiyələr verilib.
Bölmənin digər xəbərləri
