Sabah Göyçayda heyvan bazarı fəaliyyətə başlayacaq VİDEO
Göyçay, 10 yanvar, Rəşad Türkoğlu, AZƏRTAC
Epizootik sabitliyin və bioloji təhlükəsizliyin qorunması, zoonoz və xüsusi təhlükəli xəstəliklərin yayılmasının qarşısının alınması məqsədilə Azərbaycan Qida Təhlükəsizliyi Agentliyi (AQTA) tərəfindən ötən il oktyabrın 25-də ölkə ərazisində müvəqqəti bağlanan heyvan bazarlarının bəzilərinin fəaliyyətinin bərpası ilə bağlı qərar qəbul edilib. Qərara əsasən, Şamaxı və Göyçay rayonlarında yerləşən heyvan satışı bazarları yenidən açılır.
AZƏRTAC-ın bölgə müxbiri xəbər verir ki, artıq bu gündən Şamaxı rayonu ərazisində fəaliyyət göstərən heyvan bazarı işə başlayıb. Sabah səhər saatlarından isə Göyçayda yerləşən heyvan bazarı yenidən fəaliyyət göstərəcək. Bununla da, Göyçay və ətraf rayonlardan olan sahibkarlar və fermerlər heyvanlarını bazara gətirərək, satış həyata keçirə biləcəklər.
Bazarın direktoru Əliağa Həsənzadənin AZƏRTAC-ın bölgə müxbirinə verdiyi məlumata görə, fəaliyyət göstərmədiyi dövrdə müvafiq tapşırıq və tövsiyələrə uyğun olaraq, bazar ərazisində zəruri işlər görülüb. Ərazi tam təmizlənib, səliqə-sahman yaradılıb, dezinfeksiya tədbirləri aparılıb və bu proses mütəmadi olaraq davam etdiriləcək.“Bazar ərazisində asfalt-beton örtüyü salınıb, heyvanların rahat və təhlükəsiz hərəkəti üçün rampalar və çardaqlar quraşdırılıb, baytar həkimin nəzarəti üçün məntəqə tikilib. Eyni zamanda, baytarlıq nəzarəti zamanı xəstəlik əlamətləri aşkar edilən heyvanların təcrid olunaraq saxlanılması məqsədilə xüsusi yerlər yaradılıb. Bazarın giriş və çıxış qapılarında dezbaryerlər quraşdırılıb, həmçinin yem anbarı, iri və xırdabuynuzlu heyvanların satış sahələri yenidən qurulub. Bundan başqa, qida təhlükəsizliyi və sanitar tələblərin təmin edilməsi məqsədilə iaşə obyektləri bazar ərazisindən kənara çıxarılıb”, – deyə o bildirib.
Qeyd edilib ki, bazarda atların, it və pişiklərin, eləcə də digər bu kimi heyvan və quşların satışı qadağan olunacaq. İlkin mərhələdə yalnız iri və xırdabuynuzlu heyvanların alqı-satqısı həyata keçiriləcək. Bazar həftədə iki gün — bazar və cümə axşamı günləri fəaliyyət göstərəcək.
Xatırladaq ki, Ümumdünya Heyvan Sağlamlığı Təşkilatının rəsmi məlumatlarına əsasən, müxtəlif ölkələrdə heyvanlar arasında xüsusi təhlükəli yoluxucu xəstəliklər yayılır. Mövsümi amillərdən asılı olaraq, müxtəlif xəstəlik törədicilərinin yayılması riski region ölkələri, o cümlədən Azərbaycan üçün real təhlükə yaratdığından, respublikamızın həmsərhəd bölgələri, heyvanların mövsümi miqrasiya marşrutları, eləcə də heyvan bazarları yüksək risk əraziləri kimi müəyyən edilib.
Heyvan bazarlarında müxtəlif mənşəli heyvanların bir yerdə saxlanılması, satış və daşınma prosesləri infeksiya törədicilərinin yayılmasına, ölkə ərazisində xəstəliklərin başvermə riskinin artmasına səbəb ola biləcəyindən, epizootik sabitliyin və bioloji təhlükəsizliyin qorunması, zoonoz və xüsusi təhlükəli xəstəliklərin yayılmasının qarşısının alınması məqsədilə AQTA tərəfindən bir sıra zəruri tədbirlər görülüb. Respublikanın baş dövlət baytarlıq müfəttişinin imzaladığı müvafiq qərara əsasən, ölkə ərazisində fəaliyyət göstərən heyvan bazarlarında oktyabrın 25-dən etibarən sağlamlaşdırma tədbirlərinin görülməsi üçün mərhələli şəkildə müvəqqəti məhdudiyyətlər tətbiq olunub.
Bölmənin digər xəbərləri
