“Sabirabad rayonunun sel suları altında qalmış torpaqlarının münbitliyinin bərpası” kitabı nəşr olunmuşdur
Bakı, 15 dekabr (AZƏRTAC). Müəlliflər kollektivi tərəfindən “Sabirabad rayonunun sel suları altında qalmış torpaqlarının münbitliyinin bərpası” kitabı çapdan çıxmışdır.
Kitab Azərbaycan Respublikası Prezidenti yanında Elmin İnkişafı Fondunun maliyyə yardımı ilə nəşr olunmuşdur.
Azərbaycan Milli Elmlər Akademiyasından AZƏRTAC-a bildirmişlər ki, fermerlər və fərdi təsərrüfatçılar üçün nəzərdə tutulmuş yeni nəşrdə, torpaq-iqlim şəraiti nəzərə alınmaqla, elmi cəhətdən əsaslandırılmış növbəli əkin dövriyyəsi sxemi tətbiq edilərək lazımi aqrotexniki tədbirləri həyata keçirməklə Sabirabad rayonunun sel suları altında qalmış torpaqlarının münbitliyinin bərpasına xidmət edir. Kitabda əkin dövriyyəsinə daxil olan yonca, taxıl, pambıq və tərəvəz bitkilərinin becərilməsinin aqrotexnoloji xəritəsi hazırlanmışdır. Burada nəzərdə tutulan aqrotexniki tədbirləri həyata keçirməklə fermerlər Sabirabad rayonunun suvarılan çəmən-boz və allüvial-çəmən torpaqlarının bərpasına nail ola biləcəklər.
Yeni nəşrdən fermerlər və fərdi təsərrüfatçılarla bərabər aqronomlar, torpaqşünaslar da istifadə edə bilərlər.
Bölmənin digər xəbərləri
