Şamaxı Astrofizika Rəsədxanasının növbəti astroseminarı
Bakı, 9 iyun, AZƏRTAC
Elm və Təhsil Nazirliyinin Nəsirəddin Tusi adına Şamaxı Astrofizika Rəsədxanasında (ŞAR) Gənc Alim və Mütəxəssislər Şurasının növbəti astroseminarı keçirilib.
ŞAR-dan AZƏRTAC-a bildirilib ki, seminara rəhbərlik edən astronomiya üzrə fəlsəfə doktoru Ülkər Rüstəm seminarın mövzusu haqqında məlumat verib.
Sonra Polşanın Yan Koçanovski Universitetinin doktorantı Şəhriyar Cəfərzadə “Təkmilləşdirilmiş Glueball Rezonans qaz modeli” mövzusunda məruzə ilə çıxış edib.
Məruzəçi seminarda Kvant Xromo-Dinamikasının (KXD) termodinamik xassələri haqqında danışıb. O, təzyiq, entropia və başqa fiziki kəmiyyətlərin temperaturdan asılılıq funksiyalarını şərh edib. Qeyd edib ki, istifadə edilən model, kritik temperaturdan kiçik enerjilərdə KXD faza diaqramını təsvir etmək üçün istifadə olunan “Adron Rezonans” qaz modelidir.
Adronların xüsusi növü olan qlubollar arasındakı qarşılıqlı təsirin termodinamikaya təsiri üçün aldığımız son nəticələri təqdim edən məruzəçi yekunda KXD faza diaqramının Neytron ulduzların xassələrinin öyrənilməsindəki rolu haqqında da məlumat verib.
Məruzə seminar iştirakçıları tərəfindən maraqla qarşılanıb. Mövzu ətrafında müzakirə aparılıb, suallar cavablandırılıb.
Bölmənin digər xəbərləri
