Şamaxı Astrofizika Rəsədxanasının növbəti astroseminarı
Bakı, 16 iyun, AZƏRTAC
Elm və Təhsil Nazirliyinin N.Tusi adına Şamaxı Astrofizika Rəsədxanasında (ŞAR) növbəti astroseminar keçirilib.
ŞAR-dan AZƏRTAC-a bildirilib ki, seminara rəhbərlik edən rəsədxananın icraçı direktoru professor Nəriman İsmayılov məruzənin mövzusu haqqında məlumat verib.
Sonra ŞAR-ın əməkdaşı Həzi Qasımov “Periodik kometlərin ailələrə bölünməsi prinsipləri” mövzusunda məruzə ilə çıxış edib. O qeyd edib ki, tədqiqat işi periodik kometlərin afeli məsafələrinin Günəş sisteminə mənsub olan nəhəng planetlərin yaxınlığında konsentrasiyası məsələsinə həsr olunub. İşdə periodik kometlərin afeli məsafələrinin statistik təhlili aparılıb. Tədqiqata Günəş ətrafında dolanma periodu 200 ildən kiçik olan kometlər cəlb olunub. Baxılan kometlərin başlıca dinamik xüsusiyyəti onların afelilərinin nəhəng planetlərin yaxınlığında qeyri-bərabər paylanmasıdır.
Məruzə seminar iştirakçıları tərəfindən maraqla qarşılanıb.
Sonda mövzu ətrafında diskussiya aparılıb, seminar iştirakçılarını maraqlandıran suallar cavablandırılıb.
Bölmənin digər xəbərləri
