SAMBO ÜZRƏ ÖLKƏ ÇEMPİONATININ QALİBLƏRİ MƏLUM OLMUŞDUR
AZƏRTAC xəbər verir ki, Maştağa Olimpiya İdman Kompleksində sambo üzrə Azərbaycan çempionatı başa çatmışdır. Üç gün davam etmiş yarışda yeniyetmə, gənclər və böyüklər arasında 600-dən çox idmançı mübarizə aparmışdır.
Çempionatın sonuncu günü böyüklər arasında qaliblər məlum olmuşdur. Yarışın nəticələrinə əsasən İslam Qasımov (52 kq, “Neftçi”), Elşən İsmayılov (57 kq, Mingəçevir), Hakim Nəzərəliyev (62 kq, Gəncə), Zabil Fərhadov (68 kq, Sumqayıt), Azər Fətullayev (74 kq, “Neftçi”), Akif Xudiyev (82 kq, “Məşəl”), Yasin Həsənov (90 kq, “Pəhləvan”), Ruslan Rüstəmov (100 kq, Mingəçevir), Vasif Səfərbəyov (100 kq-dan yuxarı, Sərhəd Qoşunları) Azərbaycan çempionu adını qazanmışlar.
Qeyd edək ki, ölkə çempionatında fərqlənmiş idmançılar yığma komandanın əsasını təşkil edəcəklər. Ötən il yeniyetmə və gənc samboçuların beynəlxalq turnirlərdə, Avropa və dünya birinciliklərində uğurlu nəticələri daha çox olduğundan yeni mövsümdə onlardan bəzilərinin böyüklər arasında çıxış edəcəyi istisna olunmur. Kişilər arasında ən mötəbər turnir apreldə Bolqarıstanda keçiriləcək Avropa çempionatı olacaqdır.
Bölmənin digər xəbərləri
