SDU tələbələrinə rəqabətin təmin edilməsi ilə bağlı açıq dərs təşkil olunub
Bakı, 30 aprel, AZƏRTAC
Azərbaycan Respublikasının Prezidenti yanında Antiinhisar və İstehlak Bazarına Nəzarət Dövlət Agentliyi və Sumqayıt Dövlət Universitetinin (SDU) birgə təşkilatçılığı ilə tələbələr üçün rəqabətin təmin edilməsi mövzusunda açıq dərs təşkil olunub.
Dövlət Agentliyindən AZƏRTAC-a bildirilib ki, açıq dərsdə qurumun Təbii inhisarlara dövlət nəzarəti şöbəsinin sektor müdiri Rövşən Camalov “Rəqabətin təmin olunmasının üstünlükləri” mövzusunda təqdimatla çıxış edib. Çıxış zamanı rəqabət siyasətinin əsas prinsipləri tələbələrin diqqətinə çatdırılıb, bazarda rəqabəti məhdudlaşdıran sazişlərin mahiyyəti izah edilib. Eyni zamanda, hökmran mövqenin müəyyənləşdirilməsi meyarları, bu mövqedən sui-istifadə halları, eləcə də rəqabət orqanı tərəfindən təbii inhisar subyektlərinin fəaliyyətinə dövlət nəzarətinin mahiyyəti və təşkili barədə məlumat verilib.
Tədbir zamanı rəqabət qanunvericiliyinin pozulmasına görə tətbiq edilən məsuliyyət tədbirləri və bu sahədə mövcud tənzimləmə mexanizmləri barədə də geniş izahlar təqdim olunub.
Tədbir tələbələri maraqlandıran sualların cavablandırılması ilə yekunlaşıb.
Bölmənin digər xəbərləri
