Seçki məntəqələrində fiziki məhdudiyyətli seçicilər üçün xüsusi panduslar quraşdırılacaq
Bakı, 29 yanvar, AZƏRTAC
2020-ci il fevralın 9-na təyin edilmiş Milli Məclisə seçkilərlə əlaqədar fiziki məhdudiyyəti olan vətəndaşların səs vermələri üçün lazımi şərait yaradılır.
AZƏRTAC xəbər verir ki, bunu Secki-2020.az saytına açıqlamasında Mərkəzi Seçki Komissiyasının (MSK) katibi Mikayıl Rəhimov deyib.
Onun sözlərinə görə, ehtiyacı olan bütün məntəqələr xüsusi panduslarla təmin edilir.
“Məntəqələrdə xüsusi panduslar quraşdırılır ki, fiziki məhdudiyyəti olan seçicilər məntəqəyə sərbəst şəkildə daxil olaraq səsvermə hüququndan istifadə edə bilsinlər. Bütün bunlar diqqət mərkəzindədir və heç kəs diqqətdən kənarda qalmayacaq. Fiziki məhdudiyyətli seçicilərin də səsvermə hüquqları var, onların bu hüquqları tanınır”,- deyə Mikayıl Rəhimov vurğulayıb.
Bölmənin digər xəbərləri
