“ŞƏFQƏT” QƏZETİNİN 15 YAŞI TAMAM OLDU
AZƏRTAC xəbər verir ki, Azərbaycanın ilk tibb qəzetinin - Səhiyyə Nazirliyinin orqanı “Şəfqət” qəzetinin 15 yaşı tamam oldu. Qəzetin ilk nömrəsi 1991-ci il yanvarın 5-də çıxmışdır. Qəzet o vaxtlar “Şəfqət və sağlamlıq” Fondunun, respublika Uşaq Fondunun və Qadınlar Şurasının orqanı idi. Hazırda 8 min nüsxə tirajla çıxan qəzetin səhifələrində ötən dövr ərzində tibb elminin yenilikləri, mütəxəssislərin məsləhətləri dərc edilmiş, qabaqcıl səhiyyə müəssisələrinin təcrübəsi yayılmış, Hippokrat andını pozan həkimlər, habelə səhiyyədə mənfi hallar kəskin tənqid olunmuşdur.
Qəzetin baş redaktoru Gürcüstanın əməkdar jurnalisti Həmid Vəliyevdir. Qəzetin oxucuları “Ölkə səhiyyəsinin tarixindən”, “Azərbaycan tibb elmi beynıəlxalq aləmdə”, “Mütəxəssis sözü...”, “Azərbaycan elminin görkəmli nümayəndələri”, “Siz soruşursunuz, biz cavab veririk” daimi rubrikalarından yeni məlumat və biliklər alırlar.
