Xalqımızın müqəddəs and yeri olan Şəhidlər xiyabanına səhər tezdən dövlət və hökumət nümayəndələri, Milli Məclisin deputatları, xarici ölkələrin Azərbaycandakı səfirləri, beynəlxalq təşkilatların təmsilçiləri, paytaxt ictimaiyyətinin nümayəndələri toplaşmışdılar.

Baş nazir İlham Əliyev onları səmimiyyətlə salamladı və ona yaxınlaşan kütləvi informasiya vasitələri nümayəndələrinin suallarına cavab verdi.

SUAL: İlham müəllim, Dövlət müstəqilliyi günündə Azərbaycana nə arzulayardınız?

CAVAB: Biz istəyirik ki, Azərbaycan müstəqil dövlət kimi möhkəmlənsin, güclənsin. Çalışacağıq ki, belə də olsun. Azərbaycanın dövlət müstəqilliyi ölkəmizin ən böyük sərvətidir. Hamımızın borcudur ki, dövlətimizi möhkəmləndirək.

SUAL: Bakıda baş vermiş son hadisələrlə bağlı nə deyə bilərsiniz? Xarici ölkələrin bəzi informasiya vasitələri bunu dövlət çevrilişinə cəhd kimi də qiymətləndirirlər. Belə faktlar varmı?

CAVAB: Belə faktlar yoxdur, bu, kütləvi iğtişaşlardır, müxalifətin radikal qanadı özünün iç üzünü bir daha göstərdi. Bilirsinizmi, bu barədə mən dəfələrlə öz fikirlərimi bildirmişəm. Demişdim ki, heç nə unudulmayıbdır. Azərbaycan xalqı yaxşı xatırlayır ki, 1992-ci ildə, 1993-cü ildə məhz bu adamlar Azərbaycanda qardaş qanı tökdülər. Məhz bu adamlar Azərbaycanı xaosa, böhrana saldılar, ondan sonra qaçıb gizləndilər. Bu hadisələr də sanki, onun bir növ təkrarı idi. Fərq onda idi ki, o vaxt onların bu dağıdıcı fəaliyyəti 1992-ci ildə Azərbaycanda hakimiyyətdə olan qüvvələrə təsir edə bilmişdi. Bu dəfə isə bu, alınmayıb və heç vaxt da alınmayacaqdır. Azərbaycan qüdrətli dövlətdir, özünü müdafiə etməyə qadirdir. Belə hərəkətlərə, əlbəttə ki, son qoyulub və bundan sonra da ciddi tədbirlər görüləcəkdir. O adamlar ki, bu iğtişaşlarda iştirak ediblər, ona rəhbərlik ediblər, insanları qeyri-qanuni hərəkətlərə təhrik ediblər, onlar qanun qarşısında cavab verəcəklər.

X X X

Azərbaycanın azadlığı, suverenliyi və ərazi bütövlüyü uğrunda canlarını qurban vermiş, qəhrəmancasına həlak olmuş mərd mübarizlərin əziz xatirəsinə ehtiram əlaməti olaraq paytaxtımızın ən yüksək nöqtəsində ucaldılmış “Əbədi məşəl” abidəsi önünə əklil qoyuldu. Əklilin üzərində bu sözlər yazılmışdı: “Şəhidlərimizin əziz xatirəsinə, Azərbaycan Respublikasının Prezidentindən”.

Hərbi orkestrin ifasında respublikamızın dövlət himni əzəmətlə səsləndi.

Xarici ölkələrin səfirləri, beynəlxalq təşkilatların ölkəmizdə fəaliyyət göstərən nümayəndələri Baş nazir İlham Əliyevə yaxınlaşaraq, Azərbaycanın Dövlət müstəqilliyi haqqında Konstitusiya aktının qəbul olunmasının 12-ci ildönümü münasibətilə onu təbrik etdilər, səmimi arzularını bildirdilər, xalqımıza sülh və tərəqqi arzuladılar.

Baş nazir İlham Əliyev onlara minnətdarlığını bildirdi.

Sonra Baş nazir İlham Əliyev Prezident seçilməsi münasibətilə onu təbrik edən mətbuat nümayəndələrinin suallarına cavab verdi.

SUAL: Azərbaycan Respublikasının yeni seçilmiş Prezidenti kimi xalqımıza nə arzulayırsınız?

CAVAB: Sağ olun. Mən dəfələrlə demişəm, çalışacağam ki, Azərbaycan xalqına xidmət edim, Azərbaycan inkişaf etsin, zəngin dövlətə çevrilsin. Azərbaycanda yaşayan hər bir vətəndaş özünü rahat, sərbəst, azad hiss etsin, onun yaşayış səviyyəsi yüksəlsin. Mənim arzum budur.

Arzum budur ki, Azərbaycan müstəqil dövlət kimi dünya birliyində daha möhkəm mövqelər tuta bilsin. Bu istiqamətdə də böyük işlər aparılıbdır. Bir sözlə, mən çalışacağam ki, Azərbaycanda son on il ərzində yaranmış vəziyyət, onunla bağlı inkişaf özünü daha da büruzə versin. Çalışacağam ki, Heydər Əliyev siyasətini ləyaqətlə davam etdirim.

SUAL: İlham müəllim, seçkilərin nəticələri məlumdur, artıq bildiniz ki, Siz qalib gəlmisiniz. İlk olaraq Heydər Əliyev Sizi təbrik etdi, yoxsa Siz ona zəng etdiniz?

CAVAB: Bəli, mən zəng etdim və məlumat verdim. O da seçki prosesini izləyirdi və məni təbrik etdi.

SUAL: Onun Sizə tövsiyəsi oldumu?

CAVAB: Məsləhəti seçkilərdən qabaq olmuşdu. Yeni bir tövsiyə eşitmədim.

SUAL: Siz seçkilərdə qələbənizə inanırdınızmı?

CAVAB: Mən inanırdım ki, qalib gələcəyəm, çünki seçkilərdən əvvəlki bütün proseslər onu göstərirdi ki, Azərbaycan xalqı artıq öz seçimini edibdir. Eyni zamanda, seçkiyə qədər bir-iki həftə ərzində keçirdiyim görüşlər də bunu göstərirdi. Yəni xalqın münasibəti mənə bəlli idi. Sözün düzü, şübhə etmirdim ki, qələbə qazanacağam.

SUAL: Bakıda baş verən son hadisələri necə qiymətləndirirsiniz?

CAVAB: Mən bu hadisələri kütləvi iğtişaşlar kimi, bunları törədən adamların 1990-cı illərin əvvəllərinə qayıdışa cəhdi kimi qiymətləndirirəm. Xaos, anarxiya yaratmaq cəhdi kimi qiymətləndirirəm. Lakin bu, mümkün deyildir. Azərbaycan dövləti formalaşmışdır. Bu kütləvi iğtişaşlarda iştirak etmiş, vandalizmə yol vermiş bütün ünsürlər Azərbaycan Respublikasının qanunları qarşısında cavab verməli olacaqlar.

SUAL: İsa Qəmbəri, müxalifəti bu iğtsişaşların təşkilatçıları hesab etmək olarmı?

CAVAB: Bunu Azərbaycan xalqı və hüquq mühafizə orqanları həll edəcəklər. Mən hüquq mühafizə orqanlarının əvəzinə fikir söyləyə bilmərəm. Təhqiqat aparılacaq və partiyada vəzifə tutub-tutmamasından asılı olmayaraq, hər kəsin, bu iğtişaşlarda nə dərəcədə əli olduğu müəyyən ediləcəkdir. Qanun qarşısında hamı bərabərdir. Bəzən elə olur ki, cinayət törətmək üçün partiya lideri olurlar və beləliklə, immunitet qazanırlar. Mən hesab edirəm ki, qanun qarşısında hamı cavab verməlidir. İsa Qəmbəri isə təhrikçi, qan tökülməsinin səbəbkarı kimi bütün Azərbaycan xalqı lənətləyəcəkdir.

SUAL: Bu hadisə ölkəmizin beynəlxalq imicinə təsir edə bilərmi?

CAVAB: Əlbəttə, təsir edə bilər. Mənfi tərəfdən təsir edə bilər. Dünyanın bütün televiziya kanalları bu kadrları göstərirlər. Axı, bütün dünyada bu kadrlara baxan vətəndaşlar bilmirlər ki, bunu törədənlər Azərbaycan cəmiyyətinin cüzi bir hissəsidir. Onlarda elə təəssürat yarana bilər ki, ümumiyyətlə, Azərbaycanda sabitlik yoxdur. Ümumiyyətlə, Azərbaycan xalqı o səviyyədədir. Ona görə bu, mənfi təsir göstərə biləcəkdir. Bütün məsuliyyəti yenə də Müsavat Partiyası, onun rəhbərləri daşıyırlar və onlar qanun qarşısında cavab verəcəklər.

SUAL: Seçkilərin xarici ölkələrdə qiymətləndirilməsi, ümumiyyətlə, sizi razı saldımı?

CAVAB: Müxtəlif qiymətlər səsləndi. Ümumilikdə, qiymət o idi ki, seçkilər real vəziyyəti əks etdirir. Yəni Azərbaycan xalqının seçimi belə idi. Azərbaycan xalqı İlham Əliyevə səs veribdir və təbii ki, müxtəlif çatışmazlıqlar da vardı. Xüsusilə, seçkilərdən qabaq olan bəzi hallar dünya standartlarına cavab vermirdi. Plakatların çap olunması, yaxud da ki, başqa məsələlər – bunlar ciddi xarakter daşımır. Ümumiyyətlə, seçkilər çox demokratik, ədalətli şəraitdə keçirilibdir. Beynəlxalq müşahidəçilərin böyük əksəriyyəti seçkilərə məhz belə qiymət veribdir. Onların bəziləri ilə mən görüşmüşəm. Onlar məni ürəkdən təbrik ediblər.

X X X

Milli Məclisin sədri Murtuz Ələsgərov, Prezidentin İcra Aparatının rəhbəri Ramiz Mehdiyev, Baş nazirin birinci müavini Artur Rasizadə və digər rəsmi şəxslər əklilqoyma mərasimində iştirak edirdilər.