Şəkidə ümumi məhsul istehsalı 17,4 faiz artıb
Şəki, 3 may, Mustafa Dadaşov, AZƏRTAC
Bu ilin yanvar-mart aylarında Şəki rayonunda iqtisadiyyatın əsas sahələrində faktiki qiymətlərlə 111 milyon 165,9 min manatlıq məhsul istehsal edilib və xidmətlər göstərilib. Bu, ötən ilin müvafiq dövrü ilə müqayisədə 17,4 faiz çoxdur. Adambaşına faktiki qiymətlərlə 605,8 manatlıq məhsul buraxılıb.
Bu barədə AZƏRTAC-ın bölgə müxbirinə Şəki Şəhər Statistika İdarəsindən məlumat verilib.
Bildirilib ki, cari ilin birinci rübündə rayonda 22 milyon 44,3 min manatlıq sənaye, 27 milyon 456,8 min manatlıq kənd təsərrüfatı məhsulları istehsal edilib. Tikinti işlərinin həcmi ötən ilin eyni dövrü ilə müqayisədə 2,1 dəfə artaraq 5 milyon 905,7 min manat olub.
Üç ayda rayonda nəqliyyat və anbar təsərrüfatı sahəsi üzrə 2 milyon 63,3 min manat, informasiya və rabitə sahəsi üzrə 1 milyon 150,9 min manat, ticarət və nəqliyyat vasitələrinin təmiri sahəsi üzrə isə 52 milyon 544,9 min manat həcmində məhsul buraxılıb və xidmətlər göstərilib.
Cari ilin yanvar-mart aylarında Şəkidə pərakəndə əmtəə dövriyyəsi 167 milyon 340,5 min manat, əhaliyə göstərilən ödənişli xidmətlərin həcmi isə 33 milyon 890,6 min manat olub.
Bölmənin digər xəbərləri
