İDMAN
Selcan Maqsudova: Əsas məqsədim ölkəmizə medal qazandırmaqdır
Bakı, 13 aprel, AZƏRTAC
Bu gün yaxşı çıxış etdim. Yarışın əvvəlində çox həyəcanlanmışdım və finala düşə bilməyəcəyimdən narahat idim. Lakin təsnifat mərhələsində səkkizinci yerdə qərarlaşaraq finala vəsiqə qazandım. Bu, mənim üçün də gözlənilməz oldu. Finalda yarışacağım üçün çox sevincliyəm.
Bunu Bakıda keçirilən batut gimnastikası, ikili mini-batut və tamblinq üzrə 26-cı Avropa çempionatında çıxış edən Azərbaycan gimnastı Selcan Maqsudova AZƏRTAC-a müsahibəsində deyib.
Yarışda qalib gəlmək üçün var gücü ilə mübarizə aparacağını vurğulayan Selcan Maqsudova bildirib ki, əsas məqsəd ilk üç yerdən birində qərarlaşmaq və ölkəmizə medal qazandırmaqdır.
Batut yarışlarında da finala yüksəlmək istədiyini bildirən S.Maqsudova deyib: “Doğma Vətənimdə çıxış edirəm. İstəyirəm ki, bütün Azərbaycan xalqını və gimnastika həvəskarlarını qələbə ilə sevindirim. Bizə yaradılan yüksək şərait və burada hökm sürən gözəl əhval-ruhiyyə sayəsində özümü yarışda deyil, məşqdəki kimi rahat hiss edirəm”.