Bakı, 10 aprel, AZƏRTAC

“Azərbaycan Sənaye Korporasiyası” ASC-də Mərkəzi Aparatın və törəmə müəssisələrin rəhbər heyətinin iştirakı ilə 2020-ci ilin yekunlarına və qarşıda görüləcək işlərə həsr edilmiş videokonfrans formatında hesabat iclası keçirilib.

ASC-dən AZƏRTAC-a bildirilib ki, iclasda 2020-ci il qlobal pandemiya səbəbindən dünya iqtisadiyyatı üçün çox çətin bir il olduğu qeyd edilib. Diqqətə çatdırılıb ki, dünya iqtisadiyyatında yaranmış durğunluq və geriləmə ölkəmizə də təsir edib, bunun da nəticəsində iqtisadi fəallıq aşağı düşüb. Sərt karantin səbəblərindən bir çox ölkələr ciddi qapanma tədbirləri görərək sərhədləri bağlamaq məcburiyyətində qalıb ki, bu da xarici bazarlara çıxışı, potensial investorların cəlbi prosesini, marketinq və satış imkanlarını aşağı salıb. Həmçinin 44 günlük Vətən müharibəsi zamanı hərbi vəziyyət səbəbindən bəzi müəssisələrin təsərrüfat fəaliyyətində müəyyən fasilələr yaranıb. Bu çətinliklərə baxmayaraq, korporasiya müəyyən dayanıqlıq göstərə bilib və qeyd edilmiş təsirləri yumşaldaraq ili müsbət nəticələrlə başa vurub. Belə ki, istər məhsul tədarükündə, istər emal və istehsal prosesində, istərsə də xidmətlərin göstərilməsində fasiləsizlik təmin olunub, işçi qüvvəsi ilə bağlı heç bir ixtisarlara yol verilməyib, əməkhaqqı, müvafiq vergi və sosial ayırmalar vaxtında ödənilib, aqrar və sənaye sahələrinin inkişafı üzrə dövlət proqramlarında nəzərdə tutulmuş tədbirlərin həyata keçirilməsi təmin edilib.

Sonra hər bir müəssisə üzrə maliyyə nəticələrinin müzakirəsi davam edib və qeyd olunub ki, hazırda müəssisələrdə kənar audit prosesi davam etməkdədir. ASC üzrə qazanılmış nailiyyətlərdə korporasiyanın ən iri müəssisəsi olan “Azəralüminium” MMC-nin rolu xüsusilə vurğulanıb. İlin ilk 8 ayı üzrə dünya birjalarında alüminiumun qiymətinin düşməsi müəssisənin göstəricilərinə mənfi təsir etsə də, müəssisə tam istehsal gücü ilə işləməkdə davam etmiş və biznes proseslərində müəyyən optimallaşdırmalar tətbiq edərək proqnoz ediləndən daha çox mənfəət əldə edə bilib.

Korporasiyanın ən iri müəssisələrindən olan “Azərpambıq ASK” MMC də ili mənfəətlə başa vurub. Müəssisə xam pambıq tədarükü və məhsul istehsalı üzrə büdcə proqnozunda nəzərdə tutulmuş həcmlərə nail olub və istehsal etdiyi məhsulun satışı strategiyasını uğurla quraraq ilin sonuna doğru xarici bazarlara məhsul satışı həcmlərini artırıb və maliyyə vəziyyətinin stabilləşməsinə nail ola bilib.

Qeyd edilib ki, büdcə proqnozlarından artıq nəticə göstərən müəssisələrdən biri də “Azəripək” MMC olub. Müəssisə rəhbərliyi tərəfindən həm daxili bazar, həm də xarici bazarlarda satış imkanları ətraflı təhlil edilib, düzgün marketinq tədbirləri həyata keçirməklə gəlirlərin artırılmasına nail olunub. Barama, ipək parça və müxtəlif ipək məhsullarının satışı ilə yanaşı, həmçinin Azərbaycanın xalçaçılıq məktəbinin ənənələrini yaşatmaq, bu qədim sənət növünü nəsildən-nəsilə ötürmək məqsədilə müəssisənin xalça sexi fəaliyyətini bərpa edib və ipək xalça istehsalına başlanılıb ki, bu istiqamətdə də tanıtım işləri davam etdirilir. Bundan əlavə, Azərbaycanın zəngin milli mədəniyyətinin genlərini daşıyan, əsl mədəniyyət nümunəsi sayılan kələğayının istehsal həcminin artırılması, bu qədim irsin yeni dövrün tələblərinə uyğun işlənməsi, öyrənilməsi və dünya bazarlarına çıxışı, eləcə də tanınması, milli brendin təşviqi istiqamətində də “Azəripək” MMC tərəfindən yola saldığımız ildə əsaslı addımlar atılıb.

Əvvəlki illər ilə müqayisədə öz gəlirlərini və əməliyyat mənfəətini əhəmiyyətli dərəcədə artıran müəssisələr arasında “ASK Ayaqqabı Fabriki” MMC də qeyd olunub. Fabrik əsasən Azərbaycan Respublikasının güc strukturları üçün (Müdafiə Nazirliyi, DİN-nin Daxili Qoşunları, DİN-in Təchizat İdarəsi, Dövlət Sərhəd Xidməti, Xüsusi Dövlət Mühafizə Xidməti - Milli Qvardiya) təbii dəridən uzunboğaz əsgər və dənizçi botları, zabit heyəti və qadın hərbi qulluqçuları üçün yay və qış çəkmələri, kazarma və hospital başmaqları istehsal etməklə yanaşı, həmçinin istehsalatda, tikintidə, limanda və dəmir yollarında çalışan fəhlələr üçün xüsusi ayaqqabılar, kişi və qadınlar üçün müxtəlif çeşiddə ayaqqabılar və idman ayaqqabıları da istehsal edir.

İllər üzrə istehsal və satış həcmlərini, həmçinin əməliyyat mənfəətini artıran müəssisələrdən biri də “ASK Şüşə MMC” olub. Belə ki, 2020-ci il ərzində həyata keçirilmiş infrastruktur layihələr, investisiya qoyuluşu və texnoloji proseslərdəki təkmilləşdirmələr istehsal həcminin artırılmasını şərtləndirib. Təəssüflə qeyd etmək lazımdır ki, COVID-19 pandemiyası səbəbindən iaşə sektorundakı tənəzzül müəssisənin satış imkanlarını xeyli aşağı salıb və zavodun istehsal gücündən tam istifadəni mümkünsüz edib. Buna baxmayaraq müəssisə ili əməliyyat mənfəəti ilə başa vurub və göstəricilərini əvvəlki illər ilə müqayisədə əhəmiyyətli dərəcədə yaxşılaşdıra bilib.

2020-ci ildə əsas fərqlənən müəssisələrdən biri də “ASK Şəki Su Elektrik Stansiyası” MMC-dir. Əvvəlki illər ilə müqayisədə yağıntıların az olması və il ərzində davam edən quraqlıq səbəbindən çayda suyun səviyyəsi aşağı olub, bu da elektrik enerjisinin istehsalında və satışında əhəmiyyətli azalmaya gətirib çıxarıb. Buna baxmayaraq müəssisədə effektiv idarəetmənin tətbiq edilməsi nəticəsində təsərrüfat fəaliyyətinin fasiləsizliyi təmin edilmiş və öhdəliklərin yerinə yetirilməsinə nail olunub.

COVID-19 pandemiyası səbəbindən xarici bazarlara çıxış imkanlarının azalması “Azərtütün ASK” MMC-nin maliyyə nəticələrinə mənfi təsir göstərib, müəssisə büdcədə nəzərdə tutulmuş hazır məhsul satışı üzrə proqnozu kəsirlə icra edərək ili zərərlə başa vurub. Satışların azalması nəticəsində müəssisənin maliyyə öhdəliklərinin icrasında müəyyən yubanmalar yaranıb ki, bu da əlavə kredit resurslarının cəlb edilməsini qaçılmaz edib.

Pandemiya səbəbindən tətbiq olunan sərt karantin rejimində bir sıra sahələrin fəaliyyətinin qismən, bəzi sahələrin fəaliyyətinin isə tam dayanması planlaşdırılan tikinti layihələrinin dayanması ilə nəticələnib və bu da əsas sifarişçiləri tikinti sektorunda olan “ASK İzolit” MMC-nin fəaliyyətinin demək olar ki, dayanmasına və 2020-ci ili zərərlə başa vurmasına gətirib çıxarıb.

“Azərbaycan Sənaye Korporasiyası” ASC-nin baş direktoru Kamran Nəbizadə tərəfindən fəaliyyətini zərərlə başa vurmuş törəmə müəssisələrin 2021-ci il üçün prioritet və hədəflərinin müəyyənləşdirilməsi, bazar tendensiyalarının öyrənilməsi, yüksək tələbat olan məhsulların müəyyən edilməsi və istehsal həcminin genişləndirilməsi, potensial bazarlara çıxış yollarının araşdırılmasına dair tapşırıqlar verilib. Korporasiyanın rəhbəri qarşıya qoyulan hədəflərə uyğun olaraq uzunmüddətli perspektivdə davamlı inkişafın və fəaliyyətin təmin edilməsinə nail olunması istiqamətində tövsiyələrini də bildirib.

İclasın sonunda konsolidə edilmiş maliyyə göstəriciləri nəzərdən keçirilib və qeyd edilib ki, Korporasiya amortizasiya, kredit faizi və vergi xərclərindən öncəki mənfəət (“EBİTDA”) göstəricisi üzrə ili müsbət nəticələrlə başa vurub. Korporasiya rəhbərliyi tərəfindən 2020-ci ildə əldə edilmiş bu müsbət nailiyyətə görə Mərkəzi Aparatın və törəmə müəssisələrin kollektivlərinə təşəkkür edilib, 2021-ci ilin tədbirlər planı üzrə qarşıda görüləcək işlər ilə bağlı müəssisə rəhbərlərinə müvafiq tapşırıq və göstərişlər verilib, əsas istiqamətlər və prioritetlər qeyd olunub, müasir texnologiyalar və beynəlxalq təcrübədən maksimum faydalanmaq, vaxtında və düzgün biznes qərarlarının verilməsi üçün uçot, hesabatlılıq, təhlil, planlaşdırma və daxili nəzarət proseslərinin daim təkmilləşdirilməsi və kadr potensialının gücləndirilməsi zəruriliyi vurğulanıb.