Sərbəst ticarət üzrə Yaponiya-ABŞ danışıqları davam edəcək
Bakı, 29 iyul, AZƏRTAC
Avqustda sərbəst ticarət üzrə Yaponiya-ABŞ danışıqları davam edəcək. AZƏRTAC Kyodo agentliyinə istinadla xəbər verir ki, tərəflər sentyabrda bu məsələyə dair saziş imzalanmasını nəzərdə tuturlar. Qeyd olunur ki, ilk növbədə, Vaşinqtonla Tokio arasında avtomobil, ehtiyat hissələri, habelə mal ətinə olan rüsumlarla bağlı kəskin fikir ayrılığının nizama salınması məsələləri müzakirə olunacaq.
Artıq bu həftə - avqustun 1-2-də Vaşinqtonda danışıqların yeni mərhələsi aparılacaq. Həmin danışıqlara Yaponiyanın İqtisadiyyatın Bərpası naziri Tosimitsu Moteqi və ABŞ-ın ticarət üzrə danışıqlarda xüsusi nümayəndəsi Robert Laythayzer sədrlik edəcəklər. Onların son görüşü iyunda Osakada keçirilən G-20 zirvə görüşü zamanı keçirilib. Bildirilir ki, hər iki tərəf sentyabr ayında ortaq məxrəcə gəlmək istəyir və həmin vaxt Yaponiyanın Baş Naziri Sindzo Abe Nyu-Yorkda keçiriləcək BMT Baş Assambleyasının sessiyasında ABŞ Prezidenti Donald Trampla görüşəcək.
Sərbəst ticarət üzrə Yaponiya-ABŞ danışıqları aprel ayında Koteqi və Laythayzerin iştirakı ilə yeni formatda başlayıb. Yaponiyada nüfuzlu kənd təsərrüfatı lobbisi iki ölkə arasında məhsullara rüsumların aşağı salınmasına qarşı çıxış edir.
Bölmənin digər xəbərləri
