Serbiyada iğtişaşlar zamanı 9 nəfər həbs edilib
Belqrad, 6 noyabr, AZƏRTAC
Serbiyanın Novı Sad şəhərində dəmir yolu vağzalında baş verən qəzaya görə ötən gün keçirilən etiraz aksiyasında saxlanılanlar olub.
AZƏRTAC xəbər verir ki, polis etiraz aksiyası zamanı zorakı davranışa və iğtişaşlara görə 9 nəfəri həbs edib.
Prokurorluğun məlumatına görə, 6 nəfər zorakı davranışa, digərləri isə dövlət əmlakına ziyan vurma, polis əməkdaşlarına hücumda və təhlükə törətməkdə şübhəli bilinir.
Qeyd edək ki, aksiya zamanı şəhər meriyasının binasına daş atılıb, pəncərələri sındırılıb. Təhlükəsizlik qüvvələri ilə etirazçılar arasında qarşıdurma olub.
Xatırladaq ki, noyabrın 1-də dəmir yolu vağzalında stansiya binasının tavanının bir hissəsinin çökməsi nəticəsində 14 nəfər həlak olub və 3 nəfər ağır yaralanıb. Noyabrın 2-si Serbiyada milli matəm elan olunmuşdu.
Serbiyanın tikinti, nəqliyyat və infrastruktur naziri Qoran Vesiç tutduğu vəzifədən istefa verəcəyini açıqlayıb.
Nihad Budaqov
AZƏRTAC-ın xüsusi müxbiri
Belqrad
Bölmənin digər xəbərləri
