SERGEY ROQAÇOV “XƏZƏR–LƏNKƏRAN”A KEÇƏ BİLƏR
AZƏRTAC Rusiya KİV-lərinə istinadla xəbər verir ki, Rusiya futbol çempionatının premyer liqasında çıxış edən “Saturn” (Romensk) komandasının və Moldova yığmasının hücumçusu Sergey Roqaçov “Xəzər – Lənkəran” klubuna keçə bilər. Qəzetlərin yazdığına görə, “Xəzər-Lənkəran”ın ukraynalı yeni baş məşqçisi Viktor Pasulko “Saturn”lu hücumçunu və Moldova yığmasında onunla birgə çıxış edən Ukraynanın “İlyiçevets” klubunun oyunçusu Sergey Laşçenkovu komandaya cəlb etmək niyyətindədir.
Xatırladaq ki, Azərbaycan çempionatının birinci dövrəsini uğursuz başa vuran “Xəzər-Lənkəran” klubu gələn il yanvarın 5-20-də yeni baş məşqçinin rəhbərliyi ilə Türkiyənin Antalya şəhərində təlim-məşq toplanışında olacaqdır. Bu müddət ərzində Lənkəran klubunun heyətinə bir neçə yeni oyunçunun cəlb ediləcəyi gözlənilir.
Bölmənin digər xəbərləri
