Şərur və Culfa rayonlarına taxıl biçininə hazırlıq işləri yekunlaşıb
Naxçıvan, 11 iyun, AZƏRTAC
Muxtar respublikanın ən böyük bölgəsi olan Şərur rayonunda taxılın tədarükünə iyun ayının 15-dən sonra başlanılacaq.
AZƏRTAC-ın Naxçıvan bürosu xəbər verir ki, Şərur taxılçıları bu ilin məhsulu üçün ötən ilin sonlarında 4731 hektar sahədə payızlıq səpin aparıblar. Bunun 4273 hektarı buğda, 458 hektarı isə arpadır. Taxılçılar payızdan indiyədək tələb olunan bütün aqrotexniki tədbirləri vaxtlı-vaxtında həyata keçirib, zəmilərin suvarılmasına, gübrələnməsinə ciddi önəm veriblər.
Məhsulun vaxtında və itkisiz tədarük olunması üçün hazırlıq tədbirləri yekunlaşdırılıb. Şərurda mövcud olan kombaynların hamısı işlək vəziyyətə gətirilib, bir neçə gün əvvəl aqrolizinq xətti ilə daha bir sahibkar yeni kombayn alıb. Taxıl daşıyacaq texnikalara da baxış keçirilib, ehtiyat hissələri və kifayət qədər yanacaq əldə olunub.
Görülən bu tədbirlər belə deməyə əsas verir ki, Şərur taxılçıları bu il də məhsulu vaxtında və itkisiz tədarük edəcəklər.
Qeyd edək ki, Şərur rayonunda inkişaf etdirilən əkinçilik sahələri içərisində taxılçılıq mühüm yer tutur. Ötən il rayonda taxılçılıq sahəsində yüksək göstəricilərə nail olunub, 3524 hektar sahədən 12 min 17 ton buğda, 603 hektar sahədən 1930 ton arpa tədarük edilib.
X X X
Culfa rayonunda da hazırlıq işləri qısa müddət ərzində yekunlaşıb və artıq taxıl biçinə başlanılıb. Son məlumata görə, 13,7 hektardan çox ərazidə buğda, 54,8 hektardan çox sahədə isə arpa biçilib.
Taxıl biçini üçün müxtəlif fiziki və hüquqi şəxslərə məxsus, ümumilikdə, 28 kombayn hazır vəziyyətə gətirilib. Bundan başqa, taxıl biçinlərinə cəlb ediləcək taxıldaşıyan avtomaşınlar və qoşqulu traktorlara, presvuran aqreqatlara baxış keçirilib, texnikaların saz vəziyyətdə olması yoxlanılıb, torpaq mülkiyyətçiləri və mexanizatorlarla maarifləndirmə işləri aparılıb, ehtiyat hissə və yanacaq tədarükü görülüb. Texnikaların daim saz vəziyyətdə olması üçün səyyar təmir briqadası yaradılıb.
Biçin zamanı yanğın təhlükəsizliyinin təmin edilməsi, yığılan məhsulun təmizlənməsi üçün xırman yerlərinin hazırlanması, sahə kənarlarındakı yolların hamarlanması və zəruri olan digər tədbirlər həyata keçirilib, taxıl biçininə hazırlıq işləri yekunlaşdırılıb.
Bölmənin digər xəbərləri
