SƏUDİYYƏ ƏRƏBİSTANI KRALLIĞI AZƏRBAYCANIN QAÇQIN VƏ MƏCBURİ KÖÇKÜNLƏRİNƏ HUMANİTAR YARDIMIN HƏCMİNİ ARTIRACAQDIR
Görüşdə səfir Elman Araslı Ermənistan-Azərbaycan, Dağlıq Qarabağ münaqişəsinin tarixi, ağır nəticələri barədə ətraflı məlumat vermiş, problemi sülh yolu ilə aradan qaldırmaq üçün Azərbaycan Prezidentinin dünya dövlətləri və nüfuzlu beynəlxalq təşkilatlarla apardığı danışıqlardan söhbət açmışdır. Diplomat vurğulamışdır ki, təcavüzkar Ermənistan münaqişənin həllində qeyri-konstruktiv mövqe tutur, Azərbaycan ərazilərinin böyük bir hissəsini on ildən çoxdur ki, işğal altında saxlayır. Bu işğal nəticəsində bir milyondan artıq Azərbaycan vətəndaşı öz doğma vətənində qaçqın və məcburi köçkünə çevrilmişdir. Onların ağır şəraitdə yaşadıqlarını bildirən səfir həmsöhbətlərinin diqqətini yurd-yuvalarından didərgin düşmüş soydaşlarımızın problemlərinə cəlb etmiş, Səudiyyə Ərəbistanı hökumətinin və humanitar təşkilatlarının respublikamızda qaçqın və məcburi köçkünlərə göstərdiyi maddi yardımın həcmini artırmaq barədə Azərbaycan tərəfinin xahişini çatdırmışdır.
Abdulla Turki və Adnan Paşa Ermənistanın təcavüzünün nəticələrinin aradan qaldırılması üçün apardığı mübarizədə Azərbaycana lazımi yardım göstərilməsi barədə kral Fəhd bin Əbdüləzizin göstərişlərini rəhbər tutaraq, Səudiyyə Ərəbistanı hökumətinin və donor təşkilatlarının uzun müddətdən bəri qaçqın və məcburi köçkünlərimizə humanitar yardım göstərdiklərini və bu yardımın həcminin artırılmasına hazır olduqlarını bildirmişlər.
