Səudiyyə Ərəbistanından Avropaya elektrik enerjisinin ixracını nəzərdə tutan memorandum imzalanıb
Qahirə, 21 iyul, AZƏRTAC
Səudiyyə Ərəbistanının “ACWA Power” şirkəti ilə bir sıra beynəlxalq tərəfdaşlar arasında saziş və qarşılıqlı anlaşma memorandumları imzalanıb.
AZƏRTAC BƏƏ-nin rəsmi xəbər agentliyinə istinadla bildirir ki, sənədlərin imzalanması “ACWA Power” şirkətinin təşkil etdiyi və “Bərpaolunan enerji və yaşıl hidrogenin ixracı” mövzusuna həsr olunmuş beynəlxalq işçi seminarı çərçivəsində baş tutub.
İmzalanan sənədlərə Səudiyyə Ərəbistanında bərpaolunan enerji mənbələrindən hasil edilən elektrik enerjisinin Avropaya ixracını nəzərdə tutan çoxtərəfli anlaşma memorandumu, eləcə də enerji ötürülməsi texnologiyaları sahəsində ixtisaslaşmış şirkətlərlə enerji təchizatının etibarlılığını və sərhədlərarası infrastrukturun səmərəliliyini artıracaq müasir ötürücü kanalların inkişaf etdirilməsini nəzərdə tutan anlaşma memorandumları daxildir.
Eyni zamanda, kommersiya istehsalına 2030-cu ildə başlanması planlaşdırılan “Yanbu Yaşıl Hidrogen Mərkəzi”nin birinci mərhələsinin başlanması üzrə birgə inkişaf sazişi də imzalanıb.
Şıxəli Əliyev
AZƏRTAC-ın xüsusi müxbiri
Qahirə
Bölmənin digər xəbərləri
