Şikayət ərizəsi əsasında meşə gözətçisi tutduğu vəzifədən azad olunmuşdur
Bakı, 23 aprel (AZƏRTAC). Lerik rayonunun Çayrud kəndi yaxınlığındakı meşə sahəsində ağacların qanunsuz qırılması ilə bağlı şikayət məktubu əsasında Ekologiya və Təbii Sərvətlər Nazirliyi (ETSN) yerində araşdırma aparmışdır.
Nazirliyin mətbuat xidmətindən AZƏRTAC-a bildirmişlər ki, şikayət məktubu Azərbaycan Respublikasının Prezidenti Administrasiyasına Bakının Sabunçu rayonu Yeni Ramana qəsəbəsinin sakini Teyyub Məlikov tərəfindən göndərilmişdir. Məktub aidiyyəti üzrə ETSN-ə daxil olduqdan dərhal sonra nazirliyin əməkdaşları Lerik Meşə Mühafizəsi və Bərpası Müəssisəsinin (MMBM) Vivəzəmin meşəbəyliyinin 15 nömrəli meşə dolayında yoxlama aparmışlar.
Yoxlama zamanı həmin ərazidə 217,10 manat köküstə nırx dəyərində 50,55 kubmetr həcmində 18 ədəd müxtəlif cins və diametrdə olan ağacın qanunsuz kəsilməsi faktı aşkar edilmişdir.
Faktla bağlı nazirliyin əməkdaşları tərəfindən müvafiq akt tərtib edilmiş, meşə gözətçisi Ə.Almasov tutduğu vəzifədən azad olunmuş, meşə fonduna dəymiş ziyan təqsirkar tərəfindən ödənilmişdir. Eyni zamanda, əraziyə cavabdeh olan digər meşə mühafizə xidməti işçilərinin barəsində də intizam tənbehi tədbirləri görülmüşdür.
Bölmənin digər xəbərləri
