Siyasi ekspert: Verilən vədlərin yerinə yetirilməməsi Ermənistanda xalqla dövlət arasında uçurum yaradıb
Bakı, 9 avqust, AZƏRTAC
Ermənistan müstəqillik qazandıqdan sonra insan hüquqları, vətəndaş cəmiyyəti və hüquqi dövlət anlayışlarına nəinki əməl olunmadı, hətta onlar kağız üzərində qaldı. Ancaq seçkilərdən sonra qalib gələn şəxs xalqın etimadını doğrultmaq məcburiyyətində idi. Buna görə də hakimiyyəti qazanmaq istəyən namizədlər insanlara bir çox vədlər verdilər. Vəd olunan əsas prioritetlər sırasında iqtisadiyyatı canlandırmaq, əhalinin məişət şəraitinin yaxşılaşdırılması və beynəlxalq aləmə inteqrasiya dururdu. Amma verilən vədlərin əksəriyyəti yerinə yetirilmədiyi üçün xalqla dövlət arasında uçurum yarandı.
Bu fikirləri AZƏRTAC-a açıqlamasında siyasi ekspert Elman Vəliyev söyləyib.
Siyasi ekspert deyib ki, Ermənistan beynəlxalq hüquqi normalara əməl etmir. Buna ən bariz misal kimi Ermənistan Azərbaycan torpaqlarının işğaldan azad etməsi ilə əlaqədar BMT Təhlükəsizlik Şurasının qətnamələrinə məhəl qoymadı. Ermənistanın beynəlxalq hüquqa tabe olmadığını digər dövlətlər də, təşkilatlar da bilir.
Ermənistan Azərbaycan torpaqlarını işğal etməklə kifayətlənməyərək həmin ərazilərdəki məscidləri dağıdıb, orada heyvan saxlayıb. Belə davranışlar beynəlxalq hüquqa zidd olmaqla bərabər, insanlıqdan da kənar hərəkətlərdir. Bütün bu vəhşiliklər Prezident İlham Əliyev tərəfindən faktlarla aparıcı beynəlxalq media qurumları vasitəsilə dünyaya çatdırıldı və nümayiş etdirildi.
İşğaldan azad olunan ərazilərə səfər edən xarici jurnalistlər sonradan yazırlar ki, bu yerlərdə reallıq tamamilə fərqli imiş. Ermənistan tərəfi yalan informasiyalar yaymaqla dünya ictimaiyyətini aldatdığını düşünür. Ermənilər bu cür çirkin əməllərlə kifayətlənməyib torpaqlarımızı Ermənistan əraziləri kimi qələmə verməyə çalışıblar. Hətta bu istiqamətdə çirkin əməllərdən də çəkinməyiblər.
E.Vəliyev vurğulayıb ki, Ermənistanda əksər ailələr öz övladlarını əsgərliyə göndərmək istəmirlər. Çünki hazırkı hakimiyyət müharibəni düşünmədən apardı. Nəticədə isə həm məğlub oldu, həm də minlərlə itki verməklə yanaşı, biabırçı kapitulyasiyaya imza atdı. Ard-arda gələn bu cür acı məğlubiyyətlər xalqda hakimiyyətə olan inamı sarsıtdı.
Müharibə bitdikdən sonra N.Paşinyan sosial şəbəkə üzərindən canlı yayımda çıxışı zamanı bildirmişdi ki, ölkədə müharibəni davam etdirmək üçün ehtiyat qüvvələrin səfərbər edilməsi ilə bağlı problemlər olub. Paşinyanın sözlərinə görə, ölkənin səfərbərliklə bağlı problemləri var idi, ümumiyyətlə, ölkə döyüş əməliyyatları aparmağa hazır deyildi. Ön cəbhədə döyüşənləri əvəz edənlər yox idi. Döyüşənlərin dincəlmə fürsəti olmalı idi. Cəbhə xəttində bir ay ərzində döyüşənləri əvəz edən yox idi. Ona görə də Ermənistan rəhbərliyi müharibəni ən qısa müddətdə bitirməyin lazım olduğu barədə qərar qəbul etdi. Əks halda, bunun nəticələri daha pis olacaqdı.
2021-ci ildə Dünya Azadlıq hesabatında Ermənistan “qismən azad” dövlətlər siyahısına əlavə olunduğunu qeyd edən ekspert deyib ki, beynəlxalq qurumlar bu qənaətə Ermənistanda baş verən siyasi prosesləri yaxından izləyərək gəliblər. Buna misal olaraq qeyd edə bilərik ki, bu ölkədə azad şəkildə etiraz formaları məhdudlaşdırılır. Belə ki, Paşinyana qarşı baş vermiş etiraz aksiyalarında tanklardan da istifadə etmək planlaşdırılırdı.
Azərbaycanın yürütdüyü uğurlu və düşünülmüş siyasət nəticəsində Ermənistan sivilizasiyadan kənarda qalmış dövlətə çevrildi. Bundan əlavə, hələ də müstəqilliyini tam şəkildə əldə edə bilməyərək, kukla kimi kimlərinsə oyuncağı olmağa davam edir. Bu cür prinsiplər azad, müstəqil, demokratik dövlət anlayışı ilə ziddiyyət təşkil edir.
Demokratik dövlət o ölkədir ki, öz müqəddəratına azad şəkildə özü qərar versin. Ölkədə yaşayan insanlar üçün söz və düşüncə azadlığı, sərbəst toplaşmaq hüququ təmin edilsin. Bu kimi xüsusiyyətlər sivil toplumun göstəriciləridir. Ancaq biz Ermənistanda bunları görə bilmirik.
“Bu gün Ermənistanın iqtisadi göstəricilərinə baxsaq görərik ki, ölkə uçurumun kənarındadır. İkinci Qarabağ müharibəsindəki məğlubiyyətdən sonra Ermənistanın vəziyyəti daha da pisləşib. Ermənistan iqtisadiyyatı tənəzzül dövrünü yaşayır. Hakimiyyət indiyədək nə sənayeni, nə də yerli istehsalat müəssisələrini inkişaf etdirə bilməyib. Ölkədə qeyri-neft sektoru isə yox dərəcəsindədir”,- deyə E.Vəliyev vurğulayıb.
Bölmənin digər xəbərləri
