Solikamsk mədənindən 9 fəhlənin meyiti çıxarılıb
Moskva, 23 dekabr, AZƏRTAC
Rusiyanın Perm vilayətinin Solikamsk şəhərində kalium mədənində baş vermiş yanğın nəticəsində 9 nəfər həlak olub.
AZƏRTAC xəbər verir ki, xilasedicilər "Uralkaliya" mədənində yanğın nəticəsində yaranmış tüstüdən boğularaq ölmüş 9 fəhlənin meyitini çıxarıblar.
Hadisə ilə bağlı yaradılmış qərargahdan bildiriblər ki, mədəndə çalışan 17 nəfərdən 8 nəfəri dərhal xilas edilib, qalan 9 nəfərlə əlaqə kəsilib. Şaxtaçılar oksigen balonları ilə təchiz edilsələr də balonların istifadə üçün nəzərdə tutulduğu vaxt yetərincə olmayıb. Mədəndə qalan fəhlələri çıxışdan cəmi 10 metr məsafə ayırmasına baxmayaraq, yüksək temperatur və tüstü onlara yaxınlaşmağa imkan verməyib.
Yanğın 500 metr dərinliyi olan mədənin 340 metrliyində montaj köpüyü və inşaat tullantılarının alovlanması nəticəsində baş verib.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
