“STP-3 Metaləritmə” zavodunda baş verən partlayışla bağlı istintaq-əməliyyat tədbirləri davam etdirilir
Bakı, 28 mart, AZƏRTAC
Sumqayıt şəhəri ərazisində yerləşən “STP-3 Metaləritmə” zavodunda martın 22-də partlayışın baş verməsi ilə bağlı daxil olan məlumat əsasında şəhərin polis və prokurorluq əməkdaşlarının iştirakı ilə dərhal hadisə yerinə baxış keçirilib və digər təxirəsalınmaz zəruri prosessual hərəkətlər yerinə yetirilib.
Sumqayıt Şəhər Prokurorluğunun AZƏRTAC-a daxil olan məlumatında bildirilir ki, ilkin araşdırmalarla həmin gün saat 13 radələrində zavodun poladəritmə sexində metalın əriyib sobanın soyutma radiatoruna toxunması nəticəsində partlayışın baş verməsi müəyyən edilib.
Hadisə nəticəsində fəhlələr Mürşüd Məmmədov, Vüqar Cəlilov, Ceyhun Qaraşov və sex rəisi Minyaz Seyidəliyev müxtəlif dərəcəli yanıq xəsarətləri alaraq xəstəxanaya yerləşdiriliblər. Martın 27-də Minyaz Seyidəliyev aldığı xəsarətlərdən müalicə olunduğu xəstəxanada vəfat edib.
Faktla bağlı Sumqayıt Şəhər Prokurorluğunda Cinayət Məcəlləsinin 162.2-ci (əmək mühafizəsi qaydalarını pozma ehtiyatsızlıqdan insan ölümünə səbəb olduqda) maddəsi ilə cinayət işi başlanıb və müvafiq ekspertizalar təyin olunub.
Hadisənin başvermə səbəbləri və təqsirkar şəxslərin müəyyənləşdirilib cinayət məsuliyyətinə cəlb olunması istiqamətində zəruri istintaq-əməliyyat tədbirləri davam etdirilir.
Bölmənin digər xəbərləri
