SUMQAYIT QIŞA HAZIRDIR
AZƏRTAC-ın müxbiri xəbər verir ki, maddi-texniki bazanın yaxşılaşdırılması və təkmilləşdirilməsi, habelə xüsusi əhəmiyyətli obyektlərin ekstremal şəraitdə avtomatik rejimə keçməsinə dair vaxtında görülmüş tədbirlər öz müsbət nəticəsini vermişdir. Şəhər xidmətlərinin əlaqəli və operativ fəaliyyəti sayəsində güclü qar yağmasının və temperaturun aşağı düşməsinin mümkün mənfi nəticələrinin qarşısı alınmışdır.
Bu qarlı qış günlərində şəhər su, elektrik enerjisi və qazla fasiləsiz olaraq təmin edilmişdir. Qaz təchizatı artırılaraq 682 min kubmetrə çatdırılmışdır. Fasiləsiz rejimdə işləyən xüsusi operativ briqadalar yaranan nasazlıqları təcili aradan qaldırmışlar.
Sumqayıt Şəhər İcra Hakimiyyətinin başçısı Vaqif Əliyev bununla əlaqədar keçirilmiş müşavirədə Sumqayıt-Bakı marşrutu ilə nəqliyyatın hərəkətinin zəif təşkilinə görə şəhər Nəqliyyat Departamentinin rəhbərliyini ciddi tənbeh etmişdir. Təmir və tikinti işlərini keyfiyyətsiz aparmış bir sıra struktur və bölmələrin rəhbərləri də kəskin tənqid olunmuşlar. Müşavirədə təbii qazdan istifadə haqqının abonentlərdən vaxtında yığılmasının vacibliyi vurğulanmışdır. Tədbirdə real vəziyyət təhlil edilmiş və pis hava şəraitinin nəticələrinin vaxtında aradan qaldırılması üçün qarşıya konkret vəzifələr qoyulmuşdur.
