SUMQAYITIN “DÜNYA-TV” TELEKANALI YENİ BİNAYA KÖÇMÜŞDÜR
Mayın 10-da, ümummilli liderimiz Heydər Əliyevin doğum günü Sumqayıtda “Dünya-TV” yerli teleradio şirkətinin yeni ikimərtəbəli binasının və 65 metr hündürlüyündə teleqüllənin açılışı olmuşdur.
Açılış mərasimində Sumqayıt İcra Hakimiyyətinin başçısı Vaqif Əliyev, şəhər ictimaiyyətinin nümayəndələri iştirak etmişlər.
“Dünya-TV” teleşirkətinin prezidenti Ramiz Hüseynov AZƏRTAC-ın müxbirinə demişdir ki, kanal 1998-ci ildən yayıma başlamışdır. Bütün bu dövr ərzində “Qarabağ” kinoteatrının binasında işləyirdik. Şəhər rəhbərliyinin köməyi və bilavasitə iştirakı ilə torpaq sahəsi ayrılmış və bir il ərzində yeni bina tikilmişdir.
R.Hüseynov vurğulamışdır ki, yeni binanın açılışı dahi liderimizin 84-cü ildönümü günü ilə bir vaxta salınmışdır. Heydər Əliyevin özəl telekanalların yaradılmasında və inkişafında, ümumən ölkədə söz azadlığının təmin edilməsində xidmətləri şəksizdir.
“Dünya-TV” regional telekanalının verilişləri hər gün 12 saat ərzində efirə çıxır. Yayım şəbəkəsində şəhər həyatının müxtəlif sahələrini əhatə edən sosial, mədəni, maarif, idman, əyləncə yönümlü 30-a yaxın proqram, habelə tok-şoular və s. vardır.
Xəbərlər departamenti gündə 3 dəfə tamaşaçılara şəhərdə, respublikada, habelə dünyada baş verən hadisələr barədə məlumat verir. “Dünya-TV”-nin Abşeron rayonunda bürosu var. Yeni teleötürücünün istifadəyə verilməsi ilə yayım radiusu 200 kilometrə qədər genişlənəcək, efirin keyfiyyəti yaxşılaşacaqdır.
