ŞUŞA RAYON İCRA HAKİMİYYƏTİNİN BAŞÇISI NİZAMİ BƏHMƏNOVUN ÇIXIŞI
-Möhtərəm cənab Prezident!
Şuşa rayonundan olan məcburi köçkünlər respublikanın 53 şəhər və rayonunda, 500-ə yaxın yaşayış məntəqəsində yaşayır. Rayon əhalisinin 17 min nəfəri Bakı şəhərində, 10 min nəfəri isə respublikanın müxtəlif şəhər və rayonlarında müvəqqəti məskunlaşmışdır. Hazırda rayonun 30 idarə, müəssisə və təşkilatı fəaliyyət göstərir.
Təməli ümummilli liderimiz, ulu öndər Heydər Əliyev tərəfindən qoyulmuş və cənab Prezident, bu gün Sizin uğurla davam etdirdiyiniz xətt - məcburi köçkünlərə göstərilən diqqət və qayğı onlar tərəfindən rəğbətlə qarşılanır.
Ulu öndər Heydər Əliyevin və Sizin sərəncamınızla təsdiq olunan müvafiq Dövlət proqramları məcburi köçkün əhalinin 1992-1998-ci illər ərzində müvəqqəti məskunlaşdığı ictimai binalardan, mənzillərdən, torpaq sahələrindən və digər obyektlərdən öz doğma yurdlarına qayıdana qədər çıxarılması hallarına birdəfəlik son qoydu. Bununla da müvafiq orqanlarla məcburi köçkün əhali arasında narazılıqlar və çəkişmələr xeyli aradan qalxdı.
Hörmətli cənab Prezident!
Müstəqil Azərbaycan Respublikası ümummilli liderimiz Heydər Əliyev tərəfindən müəyyənləşdirilmiş və Sizin uğurla davam etdirdiyiniz iqtisadi siyasət nəticəsində dünyada analoqu olmayan sürətlə inkişaf edir. Respublikanın rayonlarının sürətli inkişafı, yeni iş yerlərinin yaradılması regionlarda məskunlaşmış köçkünlərin də həyat şəraitinin yaxşılaşdırılmasına və onların işlə təmin olunmasına şərait yaradır.
Cənab Prezident, respublikamızda təhsilə və sosial sahəyə göstərdiyiniz diqqət və qayğının nəticəsində əhalimizin məskunlaşdığı Mirzələr qış yatağında və İsmayıllı rayonunda 2004-cü ildə hər biri 80 yerlik iki yeni məktəb binası tikilib istifadəyə verilmişdir. Kənd təsərrüfatı məhsullarının istehsalı ilə məşğul olan əhalimizin sosial şəraitinin yaxşılaşdırılması və onların məşulluğunun təmin olunması məqsədi ilə 500 nəfərdən çox adamın məskunlaşdığı Mirzələr-Ergi qış yataqlarına yol çəkilmiş, yataqlararası yollar təmir edilmiş, 8 ədəd yeni artezian quyusu qazılmış, köhnəlmiş elektrik xətləri tamamilə yenidən bərpa edilmişdir. Kürdəmir rayonu ərazisində yerləşən 22-23 nömrəli qış yataqlarına da yol və elektrik xətləri çəkilmişdir.
Bir faktı qeyd etmək istəyirəm. Şuşa heç vaxt kənd təsərrüfatı rayonu olmamışdır. Keçmiş sovet dövründə rayonun kolxoz və sovxozlarında qaramalın sayı 800 baş, davarın sayı 5600 baş olmuşdursa, respublikada aparılan aqrar islahatlar nəticəsində indi şuşalıların şəxsi təsərrüfatlarında 2000 baş qaramal, 26500 baş davar vardır.
Sizin göstərişiniz əsasında məcburi köçkünlərin sosial-iqtisadi şəraitinin yaxşılaşdırılması məqsədi ilə yeni salınmış çoxsaylı qəsəbələrdən biri də “Zuğulba” sanatoriyasında müvəqqəti məskunlaşmış, əksəriyyəti şuşalılardan ibarət olan məcburi köçkünlərin istifadəsinə verilmişdir. Ramanada salınmış gözəl şəraitə malik qəsəbə 450 evdən ibarətdir.
Sizin həmin qəsəbənin açılışında iştirakınız və əhali qarşısında çıxışınız şuşalılar tərəfindən böyük rəğbət hissi ilə qarşılandı və onların gələcəyə inam hissini daha da artırdı.
Cənab Prezident, fürsətdən istifadə edərək, bəzi problem və təkliflərimizi də çatdırmaq istəyirəm:
1. Sabunçu rayonunda, “Qağayı” düşərgəsində fəaliyyət göstərən Şuşa şəhər 11 nömrəli orta məktəbin yerləşdiyi bina tam yararsız vəziyyətdə olduğu üçün 2008-ci ildə Təhsil Nazirliyinin yeni məktəblərin tikilməsi üçün ayrılmış vəsaiti və ya Heydər Əliyev Fondunun vəsaiti hesabına 160 yerlik məktəb binasının tikilməsi.
2. Qəbələ rayonunun Zarağan kəndində, keçmiş sovet ordusunun hospitalında, kimyəvi maddələr tullantısı olan ərazidə müvəqqəti məskunlaşmış 40 ailənin köçürülməsi.
3. 1922-ci ilin avqust ayından indiyə kimi fəaliyyət göstərən qocaman təhsil müəssisəsi olan Şuşa Mədəni-Maarif Texnikumunun 85 illik yubileyinin qeyd olunması.
4. İşçilərin istifadə etmədikləri əmək məzuniyyəti günlərinə görə kompensasiya ödənilməsi məqsədi ilə Sizin 27 dekabr tarixli 1867 nömrəli Sərəncamınız minlərlə insanın sosial-iqtisadi şəraitinin xeyli dərəcədə yaxşılaşdırılmasına imkan yaradır. Ancaq həmin vəsaitin ödənilməsi əraziləri işğal olunmuş rayonların 2007-ci il üçün təsdiq edilmiş büdcəsində nəzərdə tutulmadığına görə, əlavə vəsaitin ayrılması.
Möhtərəm cənab Prezident!
Ulu öndərimiz Heydər Əliyev Ermənistan-Azərbaycan, Dağlıq Qarabağ münaqişəsinin həlli ilə bağlı fikirlərini açıqlayarkən dəfələrlə qeyd etmişdi ki, Şuşasız həmin münaqişənin həlli yoxdur. Siz isə bu il Ramanada qəsəbənin açılış mərasimində qeyd etdiniz ki, mən nəyi demişəmsə, onun üstündə durmuşam və duracağam. Şuşa işğaldan azad olunacaq və biz orada görüşəcəyik.
Bütün şuşalılar bu günü çox böyük həsrətlə, səbirsizliklə gözləyirlər.
Bölmənin digər xəbərləri
