Tailandda iyunun 15-dən komendant saatı ləğv ediləcək
Bakı, 12 iyun, AZƏRTAC
Tailandda koronavirusun yayılmasının qarşısını almaq məqsədi ilə tətbiq edilən komendant saatı və bir çox digər məhdudiyyətlər iyunun 15-dən etibarən ləğv ediləcək.
AZƏRTAC xarici KİV-lərə istinadla xəbər verir ki, bu barədə Tailandın koronavirus infeksiyası ilə mübarizə üzrə Dövlət Mərkəzinin mətbuat katibi Thavisin Visanuyothin Banqkokda təşkil olunan brifinqdə deyib.
“Bu gün ölkənin Baş naziri general Prayuta Çan-Oçanın sədrliyi ilə keçirilən iclasda pandemiya ilə bağlı məhdudiyyətlərin zəiflədilməsi üzrə dördüncü mərhələnin tədbirləri barədə qərar qəbul olunub. Qərara əsasən hazırda saat 23:00-dan 03:00-dək davam edilən komendant saatı iyunun 15-dən tam ləğv olunur, şagirdlərin sayı 100 nəfərdən çox olmayan təhsil müəssisələri və peşə məktəbləri fəaliyyətini bərpa edir”, - deyə Thavisin Visanuyothin bildirib.
Onun sözlərinə görə, nazirliklər, qurumlar və dövlət müəssisələri əməkdaşların peşəkarlığını artırmaq üçün seminarlar və qısamüddətli tədbirlər təşkil edə bilər. İaşə obyektlərində alkoqollu içkilərin satışına icazə verilsə də, pivəxana və barlar hələlik açılmayacaq.
Son sutka ərzində Tailandda cəmi dörd yeni koronavirus xəstəsi müəyyən edilib, onların hamısı xaricdən ölkə ərazisinə daxil olan şəxslərdir.
COVID-19 pandemiyasının statistikasını aparan Worldometers saytının Bakı vaxtı ilə bu gün saat 14:30-a olan məlumatına əsasən, Tailandda koronavirusa 3129 yoluxma halı qeydə alınıb, 58 nəfər vəfat edib. Həmçinin 2987 xəstə sağalıb.
Bölmənin digər xəbərləri
