“Tarix yaradan şəxsiyyət” – məktəbdə tədbir
Bakı, 6 mart, AZƏRTAC
Qaradağ rayonunun ərazisində fəaliyyət göstərən Cəbrayıl rayonu Dirili Qurbani adına Soltanlı kənd tam orta məktəbində xalqımızın Ümummilli Lideri Heydər Əliyevin anadan olmasının 100 illiyinə həsr edilmiş “Tarix yaradan şəxsiyyət” adlı tədbir keçirilib. Əvvəlcə iştirakçılar Azərbaycanın müstəqilliyi və ərazi bütövlüyü uğrunda canlarını fəda etmiş şəhidlərimizin xatirəsini bir dəqiqəlik sükutla yad ediblər.
AZƏRTAC xəbər verir ki, tədbirdə çıxış edən məktəbin direktoru Aygün Hüseynova Ulu Öndərimizin həyatı və fəaliyyəti haqqında məlumat verib.
Milli Məclisin deputatı Ceyhun Məmmədov Azərbaycan Respublikası Prezidentinin müvafiq Sərəncamı ilə 2023-cü ilin “Heydər Əliyev İli” elan edilməsini böyük tarixi hadisə adlandıraraq, dahi şəxsiyyətin ölkənin inkişafında göstərdiyi müstəsna xidmətlərinin, parlaq və şərəfli həyat yolunun və dövlətçilik fəaliyyətinin daha yaxından öyrənilməsi üçün bunun böyük fürsət olduğunu söyləyib və Heydər Əliyevin öz xalqını zamanın mürəkkəb tarixi-siyasi sınaqlarından uğurla çıxardığını vurğulayıb. Bildirib ki, ötən əsrin 70-ci illərindən etibarən 30 ildən artıq bir müddətdə Azərbaycanda təhsilin təşəkkülü və inkişafı bilavasitə Ümummilli Liderin adı ilə bağlıdır. Ulu Öndər dövlətin idarə olunmasına, xarici və daxili siyasətə, iqtisadi və sosial sahələrə aid bütün məsələlərin həllinə hər zaman elmi cəhətdən əsaslandırılmış şəkildə yanaşmağa üstünlük verirdi. Dahi şəxsiyyətin şah əsəri olan müasir müstəqil Azərbaycan dövləti öz suverenliyini qorumağa qadir olduğunu 44 günlük Vətən müharibəsində şanlı Zəfər qazanmaqla sübuta yetirdi.
Ümummilli Liderin genişmiqyaslı fəaliyyətində təhsilin inkişafının prioritet sahə kimi mühüm yer tutduğunu vurğulayan Ceyhun Məmmədov dahi rəhbərin qəbul etdiyi qərarların, verdiyi tapşırıqların, irəli sürdüyü uzaqgörən konseptual fikirlərin və tövsiyələrin bu gün də Azərbaycanda təhsil islahatlarının əsas istiqamətlərinin müəyyənləşdirilməsinə öz töhfəsini verdiyini bildirib.
Elm və Təhsil Nazirliyinin əməkdaşı Rövşən Ağayev qeyd edib ki, Heydər Əliyevin həyat və fəaliyyətinin tarixi məqamlarını dönə-dönə qələmə almaq, insanlara çatdırmaq vətəndaşlıq borcu olmaqla yanaşı, həm də indiki və gələcək nəsillər üçün bir nümunədir. Ulu Öndərin zəngin və çoxşaxəli irsi isə xalqımızın milli sərvətidir. Bu müqəddəs mirası qoruyub saxlamaq və gələcək nəsillərə çatdırmaq isə hər bir azərbaycanlının şərəfli vəzifəsidir.
Nazirliyin digər əməkdaşı Əhliyət Adıgözəlov isə Heydər Əliyevin Azərbaycan təhsilinin himayədarı olduğunu, bu sahədə çalışanlara, xüsusən müəllimlərə həmişə diqqət və qayğı göstərdiyini xatırladıb. Qeyd edib ki, bu gün milli təhsil sahəsində qazanılan böyük nailiyyətlərdə, aradakı kiçik fasilə istisna edilməklə, XX əsrin 30 ildən artıq bir dövrünü öz qüdrətli çiyinlərində uğurla üçüncü minilliyə daşımış böyük şəxsiyyət Heydər Əliyevin müstəsna xidmətləri haqqında böyük iftixarla danışmaq olar.
Tədbirdə məktəblilər Azərbaycana, Ümummilli Liderimiz Heydər Əliyevə, onun Vətən sevgisinə həsr olunmuş şeirlər söyləyiblər. Dünya səviyyəli şəxsiyyət olan Ulu Öndərimiz haqqında tanınmış şəxslərin, dünya dövlətləri liderlərinin söylədikləri maraqlı fikirlər, eyni zamanda, Heydər Əliyevin özünün tarixə düşmüş qiymətli kəlamları, nəsihətamiz sözləri səsləndirilib.
Dahi rəhbərin həyatından, fəaliyyətindən bəhs edən videoçarx nümayiş olunub. VII sinif şagirdi Hüseyn Quliyevin ifa etdiyi “Bayatı şiraz” muğamı, IV və VI sinif şagirdlərinin ifasında səslənən “Heydər xalqım deyəcək, xalq Heydər söyləyəcək” mahnısı tədbir iştirakçılarında kövrək hisslər doğurub. İbtidai sinif şagirdləri “Biz gənc Heydərçilərik” şüarı altında xalqın bu vətənpərvər oğlunun hər sahədə davamçısı olacaqlarını fəxrlə, iftixar hissi ilə dilə gətiriblər. İşğaldan azad olunmuş bütün bölgələrimizdə qürurla dalğalanan üçrəngli bayrağımıza həsr edilmiş rəqs ifa olunub. Ümummilli Liderimizin ordu quruculuğu, təhsil, mədəniyyət, gənclər, hüquq, iqtisadiyyat, daxili və xarici siyasət və sair sahələrlə bağlı atdığı ən önəmli addımları diqqətə çatdırılıb.
Məktəbin VI və VII sinif şagirdlərinin ifasında müstəqilliyimizə həsr olunmuş kompozisiya təqdim olunub və üçrəngli Azərbaycan bayrağı səhnədə qürurla dalğalandırılıb.
Tədbirin sonunda məktəbin ibtidai sinif müəllimləri Amalya Rüstəmova və Səbirə Həşimova, Azərbaycan dili və ədəbiyyat müəllimi Günel Məmmədova, fizika müəllimi Reyhan Yunisova, həmçinin ayrı-ayrı siniflərin şagirdləri tədbirin hazırlanmasında fəal iştirak etdiklərinə görə fəxri fərmanla təltif olunublar.
Qonaqlar xalqımızın Ümummilli Lideri Heydər Əliyevin anadan olmasının 100 illiyi münasibətilə məktəbin foyesində şagirdlər tərəfindən hazırlanmış şəkil və eksponatlarla tanış olublar.
Bölmənin digər xəbərləri
