Tariximizin qanlı səhifəsi
Bakı, 23 fevral, AZƏRTAC
Xocalı soyqırımı XX əsrin ən dəhşətli, faciəli hadisəsidir. Ermənilər tərəfindən bu amansız, qeyri-insani üsullarla həyata keçirilən soyqırımı aktı bəşər tarixinə ən qorxulu kütləvi terror aktlarından biri kimi daxil olub. Xocalı soyqırımı Azərbaycan xalqına qarşı 200 ildən çox bir müddətdə erməni millətçi-şovinistlərinin havadarlarının köməyi ilə davamlı olaraq həyata keçirilmiş etnik təmizləmə, soyqırımı siyasətinin daha ağır, dözülməz şəkildə davamı idi.
Bu sözləri AZƏRTAC-a müsahibəsində BDU-nun Tarix fakültəsinin dekanı professor İbrahim Zeynalov bildirib. Tarixçi alim qeyd edib ki, XX əsr boyu, mərhələlərlə azərbaycanlılar doğma, ata-baba torpaqlarından qovulub və həm də bütün bunlar ermənilər tərəfindən qəddarlıqla, kütləvi qırğınlarla həyata keçirilib. Sovet dövründə - 1948-1953-cü illərdə 160 min nəfərdən çox azərbaycanlı öz tarixi-etnik torpaqlarından deportasiya olunub və Azərbaycanın Kür-Araz düzənliyində yerləşdirilib. 1988-1991-ci illərdə isə azərbaycanlıların öz tarixi-etnik, ata-baba torpaqlarından qovulması davam etdirilib, 250 min soydaşımızın Qərbi Azərbaycandan məcburi şəkildə deportasiya olunması ilə Ermənistanda, öz tarixi torpaqlarında bir nəfər də olsun azərbaycanlı qalmayıb. Bununla da Ermənistan monoetnik dövlətə çevrilib.
Beynəlxalq hüquq normalarına zidd olaraq Ermənistan dövləti Azərbaycanın qədim, tarixi torpaqları olan Dağlıq Qarabağı özünə birləşdirmək istəyib, bu yolda bütün cinayət və vəhşiliyə hazır olduqlarını nümayiş etdiriblər. XX əsrin faciəsi olan Xocalı soyqırımı bu aqressiv və cinayətkar erməni siyasətinin nəticəsidir. 31 il öncə baş vermiş bu faciə təkcə Azərbaycan xalqına deyil, bütün insanlığa, bəşəriyyətə qarşı yönəlmiş ən ağır cinayətlərdən biridir. Xocalı soyqırımı əsrin Xatın, Xirosima, Naqasaki və Sonqmi kimi dəhşətli faciələri ilə bir sırada dayanır.
“Ermənilərin Xocalı şəhərini hədəfə almaqda məqsədi nə idi? Bu, bir tərəfdən Qarabağda strateji əhəmiyyətli mövqeləri ələ keçirmək digər tərəfdən isə Xocalını, ümumiyyətlə, yer üzündən birdəfəlik silmək məqsədi güdürdü. Çünki Xocalı elə bir yaşayış məskəni idi ki, o, Azərbaycan tarixinin qədim dövrlərindən müasir dövrə qədər tarix və mədəniyyət ənənələrini özündə əks etdirirdi. Bu xüsusi mədəniyyət tarixə Xocalı-Gədəbəy mədəniyyəti kimi düşmüşdür. Xocalının kromlexləri, dolmenləri, siklopları, kurqanları və digər abidələri, həmçinin müxtəlif növ məişət əşyaları insan cəmiyyətinin inkişaf dinamikasını özündə əks etdirən maddi mədəniyyət nümunələridir. Erməni işğalından sonra bütün bu maddi mədəniyyət abidələrinin məhv edilməsi və dünyanın ən qədim məzarlıqlarından sayılan Xocalı qəbiristanlığının texnika vasitəsilə darmadağın edilməsi erməni vandalizminin bariz nümunəsi olmaqla yanaşı, dünya mədəniyyətinə qarşı zorakılıq aktıdır”, - deyə professor İbrahim Zeynalov qeyd edib.
Alim xatırladıb ki, Xocalı soyqırımı - 1992-ci il fevralın 25-dən 26-na keçən gecə Ermənistan silahlı qüvvələri tərəfindən Rusiyanın 366-cı motoatıcı alayının iştirakı ilə Xocalı şəhərini işğal edərkən, etnik azərbaycanlılara qarşı törədilmiş soyqırımıdır. Xocalı soyqırımı nəticəsində 63-ü uşaq, 106-sı qadın, 70-i qoca olmaqla, 613 Xocalı sakini qətlə yetirilib, 8 ailə tamamilə məhv edilib, çoxlu sayda insan yaralanıb və itkin düşüb.
Bölmənin digər xəbərləri
