TARYA HALONEN İKİNCİ MÜDDƏTƏ FİNLANDİYA PREZİDENTİ SEÇİLDİ
AZƏRTAC-ın İTAR-TASS-dan aldığı xəbərə görə, bütün bülletenlər hesablandıqdan sonra məlum olmuşdur ki, seçicilərin 51,8 faizi Halonenə, 48,2 faizi Ninisteyə səs vermişdir. Ölkənin tarixində üçüncü dəfə olaraq, finlər altı il müddətinə dövlət başçısını müstəqim ümumxalq səsverməsi yolu ilə seçmişlər.
2000-ci ildə keçirilən əvvəlki seçkilərlə müqayisədə indiki seçkilərə bir qədər az seçici gəlmişdir. Ümumiyyətlə, seçkilərdə səs hüququna malik vətəndaşların 77 faizi iştirak etmişdir. 5 milyon nəfərdən bir qədər artıq əhalisi olan Finlandiyada təxminən 4,3 milyon adamın səs vermək hüququ var.
Tarya Halonen 1943-cü ildə doğulub, siyasi fəaliyyətinə 1971-ci ildə, indiyədək üzvü olduğu Finlandiya Sosial-Demokrat Partiyasına daxil olmaqla başlayıbdır. Müxtəlif nazir vəzifələrində çalışmışdır. Finlandiyanın siyasət tarixində 1995-ci ildə Paavo Lipponen hökumətində xarici işlər naziri olan və 2000-ci ildə ölkə prezidenti seçilən ilk qadın kimi şöhrətlənmişdir. Beynəlxalq aləmdə özünü qloballaşma problemlərinə dair diskussiyanın fəal iştirakçısı kimi göstərmişdir. Bir qızı var. Üzgüçülük, teatr və caz sevimli məşğuliyyətidir.
Bölmənin digər xəbərləri
