Təl-Əvivin Ben Qurion beynəlxalq aeroportu uçuşları dayandırıb
Bakı, 27 mart, AZƏRTAC
İsrailin Ben Qurion beynəlxalq aeroportu hüquqi islahatlara etiraz olaraq elan edilən tətil səbəbindən uçuşları müvəqqəti dayandırıb.
AZƏRTAC “The Jerusalem Post” qəzetinə istinadla xəbər verir ki, hava limanı işçiləri həmkarlar ittifaqının rəhbəri Pinças İdan “uçuşların növbəti xəbərdarlığa qədər dayandırıldığını” bildirib.
İsraildə məhkəmə islahatlarına qarşı 12 həftədir davam edən kütləvi etirazlar bazar günü polislə nümayişçilər arasında toqquşmalarla nəticələnib. Polislər bir neçə dəfə gözyaşardıcı qaz və su şırnaqlarından istifadə etməyə məcbur olublar.
Ölkədə tətillər çərçivəsində uşaq bağçalarının, məktəblərin və ticarət mərkəzlərinin fəaliyyəti də dayandırılıb.
İsrail Prezidenti İshaq Hersoq dərinləşməkdə olan böhran fonunda Baş nazir Binyamin Netanyahunu qalmaqallı məhkəmə islahatlarının qəbulu prosesini dərhal dayandırmağa çağırıb. Bu gün Binyamin Netanyahunun məsələ ilə bağlı bəyanat verəcəyi gözlənilir.
Bölmənin digər xəbərləri
