Tərtər məktəbliləri Xocalı soyqırımının təşkilatçılarının və icraçılarının cəzalandırılmasını tələb edirlər
Tərtər, 25 fevral (AZƏRTAC). Tərtər rayonunun ümumtəhsil məktəblərində Xocalı faciəsinin 22-ci ildönümü ilə əlaqədar anım mərasimləri, xatirə gecələri keçirilir, sərgi və guşələr təşkil olunur.
AZƏRTAC xəbər verir ki, Tərtər şəhər 6 saylı tam orta məktəbdə keçirilən tədbirdə Xocalı faciəsi zamanı şəhid olmuş soydaşlarımızın xatirəsi bir dəqiqəlik sükutla yad edilmişdir.
Mərasimdə çıxış edənlər XX əsrin ən dəhşətli faciəsi və onun ağır nəticələri, Xocalının dinc əhalisinə qarşı törədilmiş genişmiqyaslı qanlı hərbi cinayət barədə ətraflı məlumat vermişlər. Məktəblilər dünya ictimaiyyətini Xocalıda törədilmiş terrora biganə qalmamağa çağırmış, soyqırımının təşkilatçılarının və icraçılarının beynəlxalq aləmin qınaq obyektinə çevrilərək cəzalandırılmasını, bu faciəyə hüquqi-siyasi qiymət verilməsini tələb etmişlər.
Sonra məktəbin şagirdləri Xocalı faciəsi ilə bağlı hazırladıqları bədii kompozisiyanı nümayiş etdirmişlər.
Bölmənin digər xəbərləri
