Tərtərdə maarifləndirici tədbir: “Qarabağ sahibkarlarına maarifçilik dəstəyi: Tərtərlə başlanan yol”
Tərtər, 20 oktyabr, AZƏRTAC
Tərtər rayonunda pandemiya şəraitinin tələblərinə uyğun olaraq “Qarabağ sahibkarlarına maarifçilik dəstəyi: Tərtərlə başlanan yol” mövzusunda dəyirmi masa keçirilib. Tədbir İqtisadiyyat Nazirliyi yanında Dövlət Vergi Xidməti və Tərtər Rayon İcra Hakimiyyətinin birgə təşkilatçılığı ilə yerli sahibkarlıq subyektlərinin maarifləndirilməsi məqsədilə reallaşdırılıb.
AZƏRTAC-ın bölgə müxbiri xəbər verir ki, tədbir iştirakçıları əvvəlcə ulu öndər Heydər Əliyevin abidəsini ziyarət edərək, önünə tər çiçəklər qoyublar. Gənclər və İdman İdarəsində davam edən tədbirdə çıxış edən Tərtər Rayon İcra Hakimiyyətinin başçısı Müstəqim Məmmədov Vətən müharibəsi dövründə rayona dəymiş ziyan və rayonun işğaldan azad edilmiş əraziləri haqqında məlumat verib.
Tədbirdə İqtisadiyyat Nazirliyi yanında Dövlət Vergi Xidmətinin Vergi ödəyicilərinə xidmət Baş İdarəsinin rəisi, müşavir Elçin Məmmədov, AMEA-nın İqtisadiyyat İnstitutunun direktoru, professor Nazim Müzəffərli, Dövlət Vergi Xidmətinin Tədris Mərkəzinin rəisi vəzifəsini icra edən Mirəli Kazımov, Yerli qurumların fəaliyyətinin əlaqələndirilməsi Baş İdarəsinin rəisi Elçin Bəylərov, Kiçik və Orta Biznesin İnkişafı Agentliyinin Tərtər rayonu üzrə nümayəndəsi Sənan Əhmədzadə çıxış ediblər. Bildirilib ki, Vətən müharibəsində beynəlxalq hüquq normalarını kobud şəkildə pozan düşmən dinc yaşayış məntəqələrimizi, o cümlədən döyüş bölgəsinə yaxın ərazidə yerləşən Tərtər rayonunu qadağan olunmuş silahlarla intensiv atəşə məruz qoyub. Nəticədə rayon ərazisində xeyli sayda yaşayış evi, sahibkarlıq və sosial obyektlər, nəqliyyat vasitələri, heyvandarlıq və kənd təsərrüfatı sahələri ciddi ziyan çəkib. Qeyd olunub ki, hazırda Qarabağın işğaldan azad edilmiş ərazilərində planlı şəkildə geniş bərpa-quruculuq işləri aparılır, düşmənin yerlə-yeksan etdiyi şəhər və kəndlərimiz müasir tələblər səviyyəsində yenidən qurulur.
Tədbirdə Tərtər rayonunda fəaliyyət göstərən sahibkarlıq fəaliyyəti subyektləri üçün iqtisadi və hüquqi biliklər, o cümlədən işğaldan azad edilmiş ərazilərdə dövlətin həyata keçirdiyi vergi və investisiya siyasəti mövzularında maarifləndirmə xarakterli məruzələr də yer alıb. AMEA İqtisadiyyat İnstitutunun Post-konflikt Ərazilərin Bərpası Elmi Mərkəzinin rəhbəri Akif Musayev “Post-konflikt ərazilərdə sahibkarlıq imkanları”, Dövlət Vergi Xidmətinin Tədris Mərkəzinin şöbə rəisi Nazim Əliyev “Silahlı münaqişələr zamanı dinc mülki əhaliyə vurulmuş zərərin ödənilməsinin hüquqi əsasları”, Tədris Mərkəzinin əməkdaşı Şahzadə Mədətova “Post-konflikt ərazilərdə qadın sahibkarlığının inkişafında effektiv dövlət-özəl əməkdaşlığı” mövzusunda təqdimatlarla çıxış ediblər.
Dəyirmi masa yerli sahibkarların çıxışları və müzakirələrlə davam etdirilib. Sonra qonaqlar Tərtər rayonunun işğaldan azad olunmuş Talış və Suqovuşan kəndlərinə səfər edib, Tərtər şəhərinin mərkəzində Ermənistan silahlı birləşmələri tərəfindən müxtəlif tipli reaktiv yaylım atəşi sistemləri və artilleriya qurğularından rayona atılmış mərmilərə baxıblar.
Bölmənin digər xəbərləri
