“The Jerusalem Post” qəzetində Azərbaycan səfirinin məqaləsi dərc olunub
London, 24 noyabr, AZƏRTAC
İsrailin “The Jerusalem Post” qəzetində ölkəmizin Böyük Britaniyadakı səfiri Elin Süleymanovun “Ermənistan, “İbrahim razılaşması”ndan öyrən, Azərbaycan ilə sülhə imza at” başlıqlı yazısı dərc olunub.
AZƏRTAC xəbər verir ki, məqalədə bu yaxınlarda London şəhərində keçirilən “İbrahim razılaşması”nın ildönümü tədbirində Baş nazir Rişi Sunakın “İbrahim razılaşması”nın tərəfdarlarının əldə edəcəkləri faydalardan bəhs etməsindən və Azərbaycan Respublikasının Prezidenti İlham Əliyevin regionun davamlı sabitliyi və inkişafı üçün dayanıqlı sülh seçimi etməsindən söz açılıb.
Səfir məqaləsində bildirib: “Baxmayaraq ki, Qafqazda kontekst nisbətən fərqlidir, Ermənistan ilə Azərbaycan arasında normallaşma prosesində əldə olunacaq divident sülh razılaşmasının açar elementlərindən biri olaraq qalmaqdadır. Regional inteqrasiya və iri infrastruktur layihələrinə rəhbərlik edən Azərbaycan rifah və inkişaf səviyyəsini dinamik artırmaqla Ermənistana nəqliyyat və iqtisadi əlaqələrin normallaşdırılması və bərpası istiqamətində irəliləməyi təklif edib. Bununla belə, Azərbaycanın praqmatik, reallığa əsaslanan yanaşmasının qarşısında Ermənistanın mövcud olduğu regiona tam inteqrasiya olunmaq üçün davam edən ideoloji və özünə zərər vuran istəksizliyinin şahidi oluruq”.
Səfir məqaləsində ölkəmizin qətiyyətli Qələbəsindən dərhal sonra Azərbaycan Prezidenti İlham Əliyevin Ermənistanla münasibətlərin tam normallaşmasını təklif etməsini dünya miqyasında nadir hadisə adlandırıb. Ermənistanın otuz il davam edən qeyri-qanuni işğalı, qaçqın və məcburi köçkünlərimizin öz doğma yurd-yuvalarından ayrı düşməsi, 44 günlük müharibə zamanı ermənilərin bizim şəhərlərimizə raket hücumlarına baxmayaraq, bu təklif bir daha Azərbaycanın ədavətə, nifrətə son qoymaq istəyini sübut edir. Buna görə də, Azərbaycan ərazi bütövlüyünün qarşılıqlı tanınması və sərhədlərin delimitasiyasına əsaslanan beş bənddən ibarət sülh sazişi təqdim etdi.
E.Süleymanov artıq Ermənistanın real sülhə doğru hərəkət etməsinin vacibliyini diqqətə çatdırıb. “İndi sülh prosesini ləngitmək və ya beynəlxalq aktorları bir-birinə qarşı qoymaq zamanı deyil, Ermənistan öz gələcəyi üçün məsuliyyəti üzərinə götürməlidir. Ermənistan heç vaxt rəsmi müstəqilliyini tam təsdiq edə bilməyib, ərazisindəki xarici hərbi bazalara və torpaqlarını qoruyan xarici sərhədçilərə malik olmasını nəzərə alaraq, hələ də KTMT, İran və Fransa kimi havadarlarından dəstək istəməkdədir. Bununla belə, Ermənistan yaxın tarixdən dərs çıxarmalıdır. 30 illik münaqişə ərzində bu ölkə çoxsaylı sülh təkliflərini rədd etdi və öz suverenliyinin xaricdən qorunması nəticəsində hərtərəfli məğlubiyyətə düçar oldu, gələcək üçün böyük fürsətləri qaçırdı”.
Səfir qeyd edib ki, Azərbaycan beynəlxalq tərəfdaşların, o cümlədən Britaniya və İsrail şirkətlərinin iştirakı ilə erməni işğalı nəticəsində viran qalmış şəhərlərimizin yenidən qurulmasına və dirçəldilməsinə diqqət yetirir. Ermənistan isə sülhü gecikdirmə taktikası ilə bir daha öz gələcəyini zərbə altında qoyur: “Normallaşma təkcə iqtisadi fayda ilə bağlı deyil, həm də köhnə yaraların sağalması, qonşular arasında düşmənçilik və yadlıqların aradan qaldırılması üçün möhkəm zəmin yaradır. Dünya tarixi bunun üçün əlverişli alternativ təklif etmir”.
Məqalənin sonunda səfir oxucuların diqqətinə çatdırıb ki, bu yaxınlarda Azərbaycan Parlamentində İsraildə səfirliyinin açılması qərarı iki ölkə arasında tərəfdaşlığı daha da möhkəmləndirəcək: “Bölgəmiz ətrafında iğtişaşların intensivləşdiyi və dünyada gərginliyin getdikcə daha da artdığı bir vaxtda Ermənistan gələcəyə baxaraq sülh üçün tarixi fürsəti əldən verməməlidir”.
Aynurə Tağıyeva
AZƏRTAC-ın xüsusi müxbiri
London
Bölmənin digər xəbərləri
