Tokio apellyasiya məhkəməsi ABŞ bazası yaxınlığındakı sakinlərə kompensasiya ödənməsi barədə qərar verib
Tokio, 7 iyun, AZƏRTAC
Tokio apellyasiya məhkəməsi Yaponiya hökumətinin paytaxtın qərbində yerləşən ABŞ bazasının yaratdığı aviasiya səs-küyünə görə yaxınlıqda yaşayan sakinlərə kompensasiya ödəməsi barədə qərar qəbul edib. Lakin məhkəmə sakinlərin uçuşların dayandırılması barədə tələbini rədd edib.
AZƏRTAC yerli KİV-lərə istinadla xəbər verir ki, məhkəmə Yokota hərbi bazasının yaxınlığında yaşayan mindən çox sakinə təqribən 7 milyon dollar ödənməsi barədə qərar qəbul edib.
Məhkəmənin sədri Şiqeru Nakanaşi bildirib ki, aviasiyanın yaratdığı səs-küy qəbul edilən həddi aşır və bununla da iddiaçıların hüquqlarını pozur.
Bununla yanaşı, sakinlərə kompensasiya keçmişdə dəyən zərərə görə ödənəcək. Məhkəmə onların gələcəkdə də kompensasiya ödənməsi barədə tələbini qəbul etməyib.
Məhkəmənin qərarında, həmçinin iddiaçıların uçuşların səhər tezdən və gecə saatlarında dayandırılması barəsində tələbi də rədd edilib.
Həmin bazadan ABŞ silahlı qüvvələri ilə yanaşı, Yaponiya özünümüdafiə qüvvələri də istifadə edir.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
