Tokio Olimpiadası zamanı idman arenalarında alkoqollu içkilərin satışı qadağan ediləcək
Bakı, 23 iyun, AZƏRTAC
Tokio Olimpiadası zamanı idman arenalarında alkoqollu içkilərin satışı qadağan ediləcək.
AZƏRTAC xəbər verir ki, bu barədə “Tokio-2020” təşkilat komitəsinin rəhbəri Seyko Haşimoto mətbuat konfransında bildirib.
O, qeyd edib ki, Olimpiya Oyunlarında idman məkanlarında alkoqollu içkilərin satışının qadağan edilməsinə qərar verilib. Eyni zamanda, tamaşaçıların stadionlara özləri ilə spirtli içkilərin gətirməsinə də icazə verilməyəcək. Onun sözlərinə görə, Oyunların sponsorlarından biri olan Yaponiyanın pivə istehsalçısı “Asahi” şirkəti də bu qərarla razılaşıb.
Qeyd edək ki, əvvəlcə təşkilatçılar idman obyektlərində alkoqollu içkilərin satışına icazə verməyi planlaşdırsalar da, Yaponiyada müxalifət partiyalarının, tibb mütəxəssislərinin, eyni zamanda ölkə əhalisinin mənfi reaksiyasını nəzərə alıb fikirlərini dəyişiblər.
Tokioda 2020-ci ilin yayında keçirilməli olan Yay Olimpiya və Paralimpiya oyunları koronavirus pandemiyası ilə əlaqədar cari ilə keçirilib. Belə ki, Tokioda Olimpiya Oyunlarının iyulun 23-dən avqustun 8-dək, Paralimpiya Oyunlarının isə avqustun 24-dən sentyabrın 5-dək keçirilməsi planlaşdırılıb.
Bölmənin digər xəbərləri
