TOPONİMİYA KOMİSSİYASI XANLAR RAYONUNUN ADININ DƏYİŞDİRİLƏRƏK GÖYGÖL ADLANDIRILMASINA RAZILIQ VERMİŞDİR
AZƏRTAC xəbər verir ki, Milli Məclis yanında toponimiya komissiyasının aprelin 15-də keçirilmiş iclasında Xanlar rayonunun adının dəyişdirilməsi və Qobustan rayonu ərazisində salınmış yaşayış məntəqəsinin adlandırılması ilə bağlı məsələlərə baxılmışdır.
Komissiyanın sədri Budaq Budaqov bildirmişdir ki, Xanlar rayonunun əhalisi rayonun adının dəyişdirilərək Göygöl adlandırılması barədə komissiyaya təkidlə müraciətlər etmişdir. Daxil olan teleqram və müraciətlərdə məşhur Göygölün bu rayon ərazisində yerləşdiyi əsas gətirilir.
Komissiya üzvləri məsələ ətrafında geniş fikir mübadiləsi aparmış, coğrafi adların dəyişdirilməsi prosesində tarixiliyə üstünlük verilməsi zəruriliyini vurğulamışlar. Bölgədə turizmin inkişafı baxımından Göygöl adının məqsədəuyğunluğu qeyd olunmuşdur. Xanlar rayonundan deputat seçilmiş Rövşən Rzayev bu təkliflə əlaqədar rayonun şəhər, qəsəbə və kəndlərində, ayrı-ayrı təşkilatlarında 130-a yaxın iclasın keçirildiyini demiş, seçicilərinin arqumentləri barədə məlumat vermişdir.
Sonda toponimiya komissiyası Xanlar rayonunun adının dəyişdirilərək Göygöl adlandırılmasına razılıq vermiş və məsələnin təsdiqlənmək üçün Milli Məclisin müzakirəsinə çıxarılması barədə qərar qəbul etmişdir.
İclasda Qobustan rayonu ərazisində salınmış yeni yaşayış məntəqəsinin Əhmədli kəndi deyil, coğrafi relyefinə uyğun olaraq yerləşdiyi düzün adı ilə - Qədirli kəndi adlandırılması da müsbət qarşılanmışdır.
Bu məsələ də təsdiqlənmək üçün Milli Məclisin müzakirəsinə tövsiyə olunmuşdur.
Bölmənin digər xəbərləri
