AZƏRTAC-ın müxbiri xəbər verir ki, Prezident İlham Əliyev sentyabrın 24-də Tovuz şəhərində Heydər Əliyev Muzeyinin qarşısındakı meydanda rayon ictimaiyyətinin nümayəndələri ilə görüşmüşdür.

Rayonun ziyalıları adından çıxış edən həkim NƏSİB NAĞIYEV dövlətimizin başçısına müraciətlə dedi:

- Cənab Prezident, izacə verin, Tovuz camaatı adından Sizi salamlayım, “Xoş gəlmisiniz!” deyim, qədəmləriniz uğurlu olsun. Sizin hər gəlişiniz bizim üçün toy-bayramdır, bizə sevinc bəxş edir. Ulu öndərimiz Heydər Əliyev dörd dəfə burada olmuş, həmişə bizim rayonu diqqət mərkəzində saxlamışdır. Onun cavan, gümrah və prezidentlik dövrlərini görmüşəm. Mənim 72 yaşım var, ulu öndərin rayonumuza dörd səfərində onunla görüşmüşəm. Allah ona qəni-qəni rəhmət eləsin. O, bizə diqqət və qayğı göstərmiş, çox iş görmüşdür. Hamısını saymaqla qurtarmaz. Təkcə onu deyim ki, bu rayonda 14 iri emal zavodu tikdirib istifadəyə vermişdi. Siz də onun yolunu uğurla davam etdirirsiniz. Siz keçən il mayın 30-da Tovuza gəldiniz, Olimpiya İdman Kompleksinin təməlqoyma mərasimində iştirak etdiniz. İndi o kompleks tikilib qurtarmaq üzrədir, işlər çox yaxşı gedir. Bundan başqa, Siz tovuzlulara söz vermişdiniz ki, Müalicə-Diaqnostika Mərkəzi tikiləcəkdir. Bu gün onun inşası üçün xeyir-duanızı verəcəksiniz.

İLHAM ƏLİYEV: Bəli, gedəcəyəm.

NƏSİB NAĞIYEV: Siz Tovuzun abadlaşdırılması və quruculuq işlərinə başlanması barədə də tapşırıq vermişdiniz. Ötən səfərinizdən az vaxt keçməsinə baxmayaraq, Tovuz öz görkəmini dəyişmiş, yeniləşmişdir. Bütün yollar, küçələr, prospektlər yenidən quruldu, parklar salındı, fəvvarələr yaradıldı. Baxanda görürsən ki, Tovuz həmin Tovuz deyil, hər yan gül-çiçək içərisindədir. Biz bunların hamısına görə minnətdarıq. Bütün tovuzlular minnətdardır. Bu da hələ hamısı deyil. Tovuzda iş yerləri açılır və bu, davam edir.

Cənab Prezident, Tovuz camaatı çox yüksək əhval ruhiyyədədir. Daha əvvəlki kimi deyillər. Sözümü çox uzatmaq istəmirəm. Tovuz camaatı adından Sizə bir daha təşəkkürümü bildirirəm. Sizi özümüzə arxa bilirik. Sizə, ailənizə, övladlarınıza cansağlığı arzu edirəm. Qoy, canınız sağ olsun, möhkəm olsun və Heydər Əliyev siyasətini davam etdirin.

Sağ olun.

Prezident İLHAM ƏLİYEV təşəkkür edərək dedi:

- Sağ olun. Mən hələ beş il bundan öncə demişdim ki, bütün sahələrdə Heydər Əliyevin siyasətini davam etdirəcəyəm. Son beş il ərzində çalışmışam ki, Azərbaycanın hərtərəfli inkişafı üçün yüksək səviyyədə xidmət edim. Çox şadam ki, Azərbaycanın bütün bölgələrində böyük quruculuq işləri aparılmışdır. O cümlədən Tovuz rayonunda. Siz bunu daha yaxşı bilirsiniz, çünki burada yaşayırsınız, bu dəyişiklikləri görürsünüz. Rayon gözəlləşir, abadlaşır, yeni müəssisələr yaradılır, Olimpiya İdman Kompleksi tikilir, bu gün Müalicə-Diaqnostika Mərkəzinin təməlini qoyacağıq. İş yerləri açılır, abadlıq işləri görülür, yeni parklar salınır. Gözəl Heydər Əliyev muzeyi yaradılıb, məktəblər tikilir, yollar salınır. Yəni insanların rahatlığı və rayonun inkişafı üçün bütün tədbirlər görülür. Bütün bu tədbirlər kompleks şəkildə görülür: həm infrastruktur layihələri, həm biznesin, özəl sektorun inkişafı üçün lazım olan tədbirlər, kənd təsərrüfatının inkişafı üçün qəbul edilmiş qərarlar, güzəştli şərtlərlə kreditlərin verilməsi, yanacağın yarı qiymətə, gübrənin güzəştli şərtlərlə verilməsi. Yəni biz bu işləri görürük. Keçən ilin və bu ilin iqtisadi göstəricilərində görürük ki, bunun nə dərəcədə böyük təsiri olmuşdur.

Azərbaycanın iqtisadiyyatı belədir ki, kənd təsərrüfatı, istehsal, ərazi imkanlar baxımından çox böyük çəkiyə malik olmasa da, biz elə eləməliyik ki, qeyri-neft sektorunun inkişafı daha da sürətlə getsin. Xüsusilə bölgələrdə. Rayonlarda olan infrastruktur, şərait, xidmət, təhsil, səhiyyə ocaqlarının səviyyəsi ən yüksək dünya səviyyəsində olmalıdır. Bax, mənim istəyim də, tələbim də budur. Mən görəndə ki, işlər bu tələblərə uyğun şəkildə aparılır, çox sevinirəm. Çünki biz elə etməliyik ki, Azərbaycan vətəndaşları yaxşı şəraitdə yaşasınlar, yaxşı işlə təmin olunsunlar, uşaqlar yaxşı məktəblərdə oxusunlar, xəstələr yaxşı tibbi xidmət alsınlar. Bütün bunlar hər bir ölkənin inkişafı üçün vacib amillərdir.

Bildiyiniz kimi, Azərbaycanda çox güclü sosial siyasət aparılır. Biz Azərbaycanda bazar iqtisadiyyatı prinsiplərini tam şəkildə tətbiq etmişik. Bu gün iqtisadiyyatımızın 84 faizi özəl sektorun payına düşür. 17 il bundan əvvəl özəl sektor Azərbaycanda qeyri-qanuni vəziyyətdə fəaliyyət göstərirdi. Amma bu gün iqtisadiyyatımızın əsas hissəsi özəl sektorun hesabına formalaşıbdır. Bu da çox yüksək göstəricidir. Biz bütün iqtisadi islahatları cəsarətlə aparırıq. Təsadüfi deyil ki, Dünya Bankı və Beynəlxalq Valyuta Fondu Azərbaycanı bu il dünyanın birinci islahatçı ölkəsi kimi qəbul etdi və bunu bəyan etdi. Bütün bu işlər ümumi siyasət nəticəsində baş verir. Həm iqtisadi islahatlar, həm də siyasi islahatlar aparılır. Azərbaycanda açıq cəmiyyət formalaşıbdır. Demokratiyanın inkişafı çox sürətlə gedir. Bütün demokratik ölkələrə xas olan əlamətlər Azərbaycanda da mövcuddur. İnsanlar təhlükəsizlik, sabitlik şəraitində yaşayırlar və bu sabitlik olmasaydı, heç bir inkişafdan söhbət gedə bilməzdi. Çünki biz tarixi də bilirik, yaxın tarixi də yaxşı izləyirik və görürük ki, sabitlik pozulanda inkişaf dayanır. Nə yerli, nə də xarici sərmayələr qoyulur, daha çox ölkədən sərmayə çıxır və bunun nəticəsində iqtisadi problemlər yaranır.

Ona görə bir daha demək istəyirəm ki, biz bütün bu işləri düşünülmüş və mərkəzləşdirilmiş qaydada aparırıq - həm iqtisadi, siyasi, sosial məsələlərin həlli, regionların inkişafı, həm də regionlarda infrastrukturun yaranması. Yolların salınması, elektrik stansiyaları, ölkənin hərtərəfli inkişafı üçün lazım olan infrastruktur, əlbəttə ki, insanların rahatlığı lazım olan əsas amillərdir.

Mən demişəm, bir də demək istəyirəm ki, Azərbaycan vətəndaşları yaxşı yaşamalıdırlar, bu gün yaxşı yaşamalıdırlar. Siz də xatırlayırsınız ki, Əvvəllər, Sovet İttifaqı zamanında gələcək naminə işləyirdilər. Biz də gələcək naminə işləyirik və əvvəlki illərdə təməlini qoyduğumuz işlər Azərbaycanın gələcəyini təmin edəcəkdir. Ancaq gələcəklə bərabər, indi yaşayan insanlar - həm yaşlı nəsil, həm cavanlar, həm də uşaqlar, yeniyetmələr bu gün də bunun bəhrəsini görməlidirlər. Bunu etmək üçün çox güclü sosial siyasət və iqtisadi islahatlar aparılmalıdır.

Son beş ildə bizim dövlət büdcəmiz 10 dəfədən çox artıbdır. Heç bir başqa ölkədə belə artım sürəti yoxdur. Məlumatlar təqdim olunubdur, gələn ilin dövlət büdcəsi təxminən 14-15 milyard dollar səviyyəsində olacaqdır. 2003-cü ilin dövlət büdcəsi 1 milyard 200 milyon dollar idi. Bizim Neft Fondumuzda 10 milyard dollardan çox vəsait vardır. Ölkəmizin ümumi valyuta ehtiyatları 17 milyard dollardır. Bu, dünya miqyasında çox böyük bir göstəricidir. Biz bu vəsaitdən çox səmərəli şəkildə istifadə edirik və bu vəsaitin istifadə olunmasında hər bir vətəndaş iştitak edir. Necə?! Çünki, bütün bu xərclər Milli Məclis tərəfindən təsdiq olunur. Hər bir vətəndaş Milli Məclisdəki nümayəndələrinin vasitəsi ilə bu işlərdə iştirak edir.

Neftdən gələn bütün gəlirlər şəffaf toplanılır. Keçən il Birləşmiş Millətlər Təşkilatı Azərbaycan Dövlət Neft Fonduna şəffaflığa görə mükafat təqdim edibdir. Bu, nə deməkdir?! Bu, bizim gördüyümüz işlərə verilən qiymətdir. Birləşmiş Millətlər Təşkilatı dünyanın bir nömrəli təşkilatıdır. Dünya Bankı, Beynəlxalq Valyuta Fondu dünyanın bir nömrəli maliyyə qurumlarıdır. Onların Azərbaycana verdiyi qiymət önəm daşıyır.

O ki qaldı, bəzi süni şəkildə yaradılmış qeyri-hökumət təşkilatlarına, onlar vaxtaşırı bəzi reytinqləri dərc edirlər. Bu, ancaq siyasi konyunktura, siyasi sifarişlərdir. Azərbaycan indi bölgədə böyük mövqelərə malikdir. Bizim həm öz təbii resurslarımız var, həm də təbii resursların istənilən istiqamətə nəqli üçün əvəzolunmaz rolumuz vardır. Şübhə yox ki, bizim önəmimiz artdıqca, bizə olan diqqət də artır. Edilən təzyiqlərin sayı da arta bilərdi, amma artmadı. Çünki mənası yoxdur. Bəzi hallarda belə qeyri-cidd-cəhdlərin üzə çıxmasının təməlində məhz bu amillər dayanır ki, Azərbaycan hansı yolla inkişaf edəcək, Azərbaycanın gələcək istiqaməti hansı tərəfə olacaqdır. Amma, bizim üçün, Azərbaycan xalqı üçün, Azərbaycan iqtidarı üçün belə sual yoxdur.

Azərbaycanın inkişafı Azərbaycan xalqının milli maraqlarına əsaslanır. Bizim maraqlarımıza nə cavab verirsə, o da olacaqdır, nə də cavab vermirsə, o da olmayacaqdır. Biz bütün ölkələrlə, - həm qonşu ölkələrlə, həm də başqa, böyük ölkələrlə qarşılıqlı hörmət əsasında münasibətlər qururuq. Qarşılıqlı hörmət, bir-birimizin işinə qarışmamaq və qarşılıqlı maraqlar əsasında.

Biz dünya birliyinin layiqli üzvüyük və əlbəttə, istəyirik ki, bütün ölkələrlə münasibətlərimiz yaxşı olsun. Amma bu münasibətlər bərabər əsaslarda qurulmalıdır. Biz artıq həm bölgə miqyasında, həm də Avropa qitəsində özümüzə layiq yerimizi tuta bilmişik. Biz özümüzə arxalanırıq, öz iqtisadi potensialımıza arxalanırıq. Heç bir başqa yerdən yardım gözləmirik, almamışıq da. Bizim ən ağır dövrümüzdə, torpaqlarımız işğal altına düşəndə, soydaşlarımız qaçqın, köçkün vəziyyətinə düşəndə biz heç yerdən heç bir yardım almamışıq. Baxmayaraq ki, çətin vəziyyət idi, yalnız öz gücümüzə arxalanaraq bu vəziyyətdən çıxdıq. 1990-cı illərin ortalarında bizim imkanlarımız çox məhdud idi. O vaxt ulu öndər tərəfindən hazırlanmış neft strategiyası yeni icra olunmağa başlamışdı. Nə kəmərlərimiz var idi, nə də hasilatımız var idi. Heç bir yerdən də kömək gəlmirdi. Ölkədə də vəziyyət o qədər sabit deyildi, iqtisadiyyat dağılmışdı, sənaye dayanmışdı. Belə ağır vəziyyətdə Heydər Əliyevin fəaliyyəti Azərbaycanı ağır vəziyyətdən çıxardı.

Bu gün isə bizim qarşımızada bütün yollar açıqdır. Bizim yolumuz dövlətçilik, müstəqillik, azərbaycançılıq yoludur, Azərbaycan xalqının yaxşı, təhlükəsizlik şəraitində yaşaması əsas məqsəddir. Bütün bölgələrin inkişafı Azərbaycan dövlətinin inkişafıdır. Necə ki, güclü Azərbaycan dövləti hər bir bölgə üçün vacib amildir, bölgələrin, xüsusilə paytaxtdan uzaqda yerləşən sərhəd bölgələrinin inkişafı da həm dövlətçiliyi möhkəmləndirir, həm də bizim potensialımızı göstərir.

Tovuz rayonunun Azərbaycanın inkişafında çox böyük rolu var, böyük potensialı və böyük çəkisi var. Mən çox sevinirəm ki, burada işlər sürətlə gedir, yaxşı gedir. Mən buraya keçən il gəlmişdim, ondan əvvəl də olmuşdum və bu dəyişiklikləri görürəm. Siz də görürsünüz, amma, siz burada yaşayırsınız və buna tez öyrəşirsiniz. Tovuz rayonuna bundan sonra da gələcəyəm, idman kompleksinin, xəstəxananın, başqa obyektlərin açılışları olacaqdır. Belə gözəl anları bərabər qeyd edəcəyik.

Sizə bir daha uğurlar, cansağlığı arzulayıram.

X X X

Sonda dövlətimizin başçısı Heydər Əliyev Muzeyinin qarşısında rayon ictimaiyyətinin nümayəndələri ilə xatirə şəkli çəkdirdi.

######