TQDK TƏRƏFİNDƏN YARADILMIŞ APELLYASİYA KOMİSSİYASI ALİ MƏKTƏBLƏRƏ QƏBUL İMTAHANLARI İLƏ BAĞLI MÜRACİƏTLƏRƏ BAXIR
Tələbə Qəbulu üzrə Dövlət Komissiyası (TQDK) tərəfindən yaradılmış apellyasiya komissiyası ali məktəblərə qəbul imtahanlarında ayrı-ayrı fənlər üzrə istifadə edilmiş test tapşırıqlarının məzmunu və imtahanın gedişi ilə əlaqədar müraciətlərə baxılması üçün aşağıdakı tarixlərdə fəaliyyət göstərəcək: III qrup üzrə iyunun 30-u və iyulun 1-də; I qrup üzrə iyulun 9-u və 10-da; II qrup üzrə iyulun 15-i və 16-da; IV qrup üzrə iyulun 21-i və 22-də.
Apellyasiya komissiyası yazılı ərizələri göstərilən tarixlərdə yalnız müvafiq ixtisas qrupu üzrə qəbul edəcəkdir.
Komissiya Nərimanov rayonundakı 36 nömrəli orta məktəbin binasında (Akademik H. Əliyev küçəsi, 45) fəaliyyət göstərir.
Apellyasiya komissiyası göstərilən tarixlərdə TQDK-ya təqdim edilmiş müraciətlərə iyulun 28-dən avqustun 3-dək baxacaqdır. Abituriyentlərin aşağıdakı hallarla bağlı müraciətlərinə baxılmır: ərizə forması və cavab kartının doldurulmasında texnoloji səhvlərə yol verilməsi; imtahanın keçirilməsi qaydalarının abituriyent tərəfindən pozulması.
Abituriyent apellyasiya komissiyasına şəxsiyyəti təsdiq edən sənəd təqdim etməklə, şəxsən müraciət etməlidir. Müraciətin araşdırılması zamanı onunla birlikdə yalnız valideyni iştirak edə bilər. Üçüncü şəxslərin iştirakına icazə verilmir.
Apellyasiya komissiyasının işi başa çatdıqdan sonra imtahanların gedişi ilə bağlı müraciətlərə baxılmayacaqdır.
Bölmənin digər xəbərləri
