TÜRKİYƏ BAŞ NAZİRİNİN MOSKVAYA SƏFƏRİ
AZƏRTAC-ın xüsusi müxbiri Türkiyə Baş nazirinin mətbuat xidmətinə istinadla xəbər verir ki, Baş nazir Rəcəb Tayyib Ərdoğan avqustun 13-də Gürcüstandakı vəziyyəti müzakirə etmək üçün Moskvaya yola düşmüşdür. Səfərdə onu xarici işlər naziri Əli Babacan müşayiət edir.
O, Moskvada həmkarı Vladimir Putinlə Rusiya ilə Gürcüstan arasındakı münaqişənin nizamlanması məsələlərini müzakirə edəcək, Qafqaz İttifaqının yaradılması təklifinə Moskvanın münasibətini öyrənəcəkdir.
Türkiyə hökumətinin başçısı avqustun 14-də Moskvadan Tbilisiyə yola düşəcəkdir. Rəcəb Tayyib Ərdoğan Vladimir Putinin münaqişənin həllinə dair fikirlərini Gürcüstan Prezidenti Mixeil Saakaşviliyə çatdıracaq, onunla müzakirələr aparacaqdır.
Mətbuat xidmətinin məlumatında o da vurğulanır ki, Rəcəb Tayyib Ərdoğan iki ölkə arasında sülhə nail olmaq üçün həyata keçirdiyi bu səfərin müsbət nəticələr verəcəyinə ümid edir.
Bölmənin digər xəbərləri
