TÜRKİYƏ BƏDİİ FİLM VƏ TELEVİZİYA SERİALLARINA TAMAŞA ETMƏK ÜZRƏ DÜNYADA BİRİNCİDİR
AZƏRTAC-ın xüsusi müxbiri xəbər verir ki, Anadolu Xəbərlər Agentliyinin yaydığı məlumata görə, Türkiyə Amerika Birləşmiş Ştatlarını da ötərək teleserial və bədii filmlərə tamaşa etmək üzrə dünyada birinci yerə çıxmışdır. Təxmini statistikaya görə, Türkiyə televiziya tamaşaçıları gündə 4 saat bədii film və teleseriallara baxırlar.
Bu məlumatı yayan Anadolu Agentliyi təəssüf hissi ilə bildirir ki, Türkiyədə televizora bu qədər çox tamaşa edildiyi halda, kitab qiraətinə çox az vaxt ayrılır. Belə ki, bir yaponiyalı ildə orta hesabla 25, isveçli 10, fransız 7 kitab oxuyursa, Türkiyədə altı nəfər ildə yalnız bir kitab mütaliə edir.
