TÜRKİYƏ PREZİDENTİ AZƏRBAYCAN RƏSMİLƏRİNƏ MİNNƏTDARLIĞINI BİLDİRMİŞDİR
AZƏRTAC-ın xüsusi müxbiri xəbər verir ki, avqustun 12-də Gürcüstandakı hadisələrlə bağlı Çankaya köşkündə mətbuat konfransı keçirən Türkiyə Prezidenti Abdullah Gül Gürcüstandakı Türkiyə vətəndaşlarının çıxarılmasına yaratdıqları şəraitə görə Azərbaycan rəsmilərinə minnətdarlığını bildirmişdir.
Mətbuat konfransından öncə Cənubi Qafqazdakı vəziyyətlə bağlı Baş nazir Rəcəb Tayyib Ərdoğan və nazirlərlə geniş bir görüş keçirdiyini bildirən Abdullah Gül demişdir ki, hazırda Bakı-Tbilisi-Ceyhan və Bakı-Tbilisi-Ərzurum boru xətlərinin təhlükəsizliyi ilə bağlı heç bir problem yoxdur.
Rusiyanın Gürcüstanda hərbi əməliyyatları dayandırması barədə bəyanatından məmnunluğunu söyləyən Türkiyənin dövlət başçısı BMT, ATƏT və Aİ-nin bu istiqamətdə səylərini yüksək qiymətləndirmişdir.
Abdullah Gül onu da əlavə etmişdir ki, Baş nazir Rəcəb Tayyib Ərdoğanın Qafqaz İttifaqının yaradılması təşəbbüsü bölgədə sülhün və sabitliyin bərqərar edilməsi baxımından vaxtında irəli sürülmüş təşəbbüsdür. Onun sözlərinə görə, Türkiyə Gürcüstana humanitar yardım göndərməkdə davam edəcəkdir.
Bölmənin digər xəbərləri
