TÜRKİYƏ PREZİDENTİ ƏHMƏD NECDƏT SEZƏRİN BƏYANATI
- Dəyərli mətbuat nümayəndələri!
Cümhurbaşqanı hörmətli İlham Əliyevin dəvəti ilə dost və qardaş Azərbaycanı bir daha ziyarət etməkdən məmnunluq duyuram. Bizə göstərilən qardaşlıq münasibətinə və qonaqpərvərliyə görə təşəkkür edirəm.
Cümhurbaşqanı hörmətli Əliyevlə təkbətək və nümayəndə heyətlərinin iştirakı ilə faydalı görüşlərimiz oldu. Görüşlərimizdə siyasi və iqtisadi sahələr başda olmaqla ikitərəfli əlaqələrimizin bütün dairəsini nəzərdən keçirdik. Heç bir problemsiz davam edən çoxşaxəli əlaqələrimizin hər sahədə daha da dərinləşdirilməsinin zəruriliyini bildirdik.
Türkiyə-Azərbaycan əlaqələrinin qarşılıqlı istək və sarsılmaz təməllər əsasında davam etdirilməsində qərarlı olduğumuzu bir daha vurğuladıq. Qardaş ölkə Azərbaycanla əlaqələrimiz ortaq tarix və mədəniyyətlə yanaşı, bu gün hər sahədə inkişaf edən güclü bir işbirliyinə söykənir. Türkiyə Azərbaycanın təhlükəsizlik, əmin-amanlıq və inkişaf yolundakı bütün hədəflərini paylaşır və dəstəkləyir.
Görüşlərimizdə ölkələrimizi yaxından maraqlandıran regional sahələrə aid məsələləri də müzakirə etdik. Ermənistan-Azərbaycan, Dağlıq Qarabağ münaqişəsinin və Cənubi Qafqaz bölgəsindəki digər problemlərin sülh yolu ilə çözülməsi üçün ata biləcəyimiz qarşılıqlı addımları vurğuladıq. Dağlıq Qarabağ məsələsinin Azərbaycanın ərazi bütövlüyü çərçivəsində, beynəlxalq hüquq normalarına uyğun olaraq sülh yolu ilə aradan qaldırılmasını istəyir, bu sahədəki fəaliyyəti dəstəkləyirik. Bu mövqeyimizi və Cənubi Qafqazda əsaslı sülhün yaranması və qorunması üçün əlimizdən gələni etməyə hazır olduğumuzu azərbaycanlı qardaşlarımıza bir daha çatdırdıq.
Cənubi Qafqazda sülh, sabitlik və əmin-amanlıq əsasında işbirliyinin qurulması sahəsində hörmətli Əliyev ilə eyni fikirdə olduğumu görməkdən məmnunluq duyuram. Kipr türklərinin beynəlxalq təcriddən qurtarması sahəsində Azərbaycanın verdiyi dəstəkdən duyduğumuz məmnunluğu bir daha vurğuladım.
Türkiyə və Azərbaycan arasındakı həmrəylik və işbirliyi bütün bölgə ölkələrinə örnəkdir. Bu həmrəyliyin xalqlarımızın müştərək inkişafına təsiri önümüzdəki aylarda istismara veriləcək Bakı-Tbilisi-Ceyhan neft kəməri kimi layihələrlə yanaşı, həyata keçirilməkdə olan yeni layihələrlə daha da artacaqdır. Bu fürsətdən istifadə edərək, cümhurbaşqanı hörmətli Əliyevi Bakı-Tbilisi-Ceyhan boru kəməri ilə nəql ediləcək neftin ilk tankerə yüklənməsi münasibətilə Ceyhanda keçiriləcək mərasimə dəvət etdim.
Görüşlərimizdə ölkələrimizi strateji baxımdan daha da yaxınlaşdıracaq Bakı-Tbilisi-Ərzurum qaz kəmərinin bir müddət sonra istismara verilməsi və Bakı-Tbilisi-Axalkalaki-Qars dəmir yolu xəttinin çəkilməsində qərarlı olduğumuzu bir daha vurğuladıq.
Səfərimin Türkiyə ilə Azərbaycan arasındakı qardaşlıq əlaqələrinin inkişafında konkret rol oynayacağına və münasibətlərimizin bütün sahələrdə daha da genişlənməsinə təkan verəcəyinə inanır, hamınızı ən xoş diləklərlə salamlayıram.
Bölmənin digər xəbərləri
