TÜRKİYƏ PREZİDENTİ ƏHMƏD NECDƏT SEZƏRİN NİTQİ
- Hörmətli Cümhurbaşqanı!
Çox hörmətli xanım Əliyeva!
Dəyərli qonaqlar!
Qardaş Azərbaycanı ziyarət etməkdən böyük məmnunluq duyuram. Bakıya gəlişimizdən başlayaraq, bizlərə göstərilən yaxın münasibət və səmimi qonaqpərvərlik üçün sizə təşəkkür edirəm.
Səfər zamanı müstəqillik qazanmasından sonra çox qısa bir müddət ərzində Azərbaycanın nail olduğu böyük irəliləyişi və hər sahədə gerçəkləşdirdiyi işləri bir daha görmək imkanı qazandıq.
Türkiyə-Azərbaycan qardaşlığının çoxşaxəli işbirliyi ilə dərinləşdiyini, gücləndiyini görməkdən məmnunluq hissi keçiririk.
Türkiyə-Azərbaycan qardaşlığı və həmrəyliyi öz xüsusiyyətlərinə görə xüsusilə fərqlənir. Bu münasibətlərin banisi, dəyərli dostum, böyük öndər Prezident Heydər Əliyevin məşhur deyimi ilə ifadə etsək, “Türkiyə və Azərbaycan bir millət, iki dövlətdir”. Biz iki qardaş ölkə arasındakı nümunəvi münasibətlərin daha da inkişaf etdirilməsini arzulayırıq. Bu gün keçirdiyimiz danışıqlar zamanı Azərbaycanın da bizimlə eyni fikirdə olduğunu məmnunluq hissi ilə müşahidə etdik.
Ölkələrimiz arasındakı əməkdaşlığın digər bir ortaq məqsədi bölgəmizdə sülh, əmin-amanlıq, təhlükəsizlik, rifah və sabitliyə töhfə verməkdir. Bu ortaq məqsədə yönəlmiş Bakı-Tbilisi-Ceyhan neft boru kəmərinin qarşıdakı aylarda istismara verilməsi strateji əhəmiyyətə malik bir əməkdaşlıq layihəsinin həyata keçirilməsi olacaqdır. Ötən il may ayının sonunda Bakıda təşkil edilən mərasimdə hamımızın birlikdə Türkiyəyə nəql etməyə başladığımız neft tezliklə Ceyhana çatacaq və Xəzər nefti bu yolla bütün dünyaya ötürüləcəkdir. Cənubi Qafqaz ilə Orta Asiya ölkələrinin, hətta Çinin Avropaya, Aralıq dənizi və Atlantik okeanı hövzəsinə çıxması baxımından Bakı-Tbilisi-Ceyhan neft kəməri kimi mühüm funksiyaları yerinə yetirəcək digər layihələrin də reallaşmasını istəyirik. Bu çətin, lakin həyata keçirilməsi mümkün olan məqsədə çatmaq üçün digər bölgə ölkələrini də bu layihələrdə iştirak etməyə həvəsləndirmək lazımdır.
Möhtərəm Prezident!
Əziz qonaqlar!
Gənc Azərbaycan dövləti öz müstəqilliyini əldə etdikdən sonra labüd olan keçid dövrünü artıq arxada qoymuşdur. Bu gün Azərbaycan beynəlxalq birliyin hörmətli bir üzvü, böyük perspektivlərə malik ölkədir. Bölgəsində sülh, əməkdaşlıq və tərəqqidən başqa bir arzusu olmayan bir ölkənin torpaqlarının hələ də işğal altında olması hüquqa, ədalətə və insan haqlarına dəyər verən cəmiyyətlər tərəfindən qəbul edilə bilməz. Bölgədə əməkdaşlıq və sabitlik mühiti yaratmağa, bölgə xalqlarının rifah halının yüksəlməsinə mane olan bu işğala dərhal son qoymaq lazımdır. Hər sahədə olduğu kimi, Dağlıq Qarabağ probleminin həllində də Türkiyə Azərbaycanı tamamilə dəstəkləyir. Bu münaqişə Azərbaycanın ərazi bütövlüyü çərçivəsində və azərbaycanlı qardaşlarımızın qəbul edə biləcəyi şərtlərlə həll edilməlidir. Türkiyə bu sahədə üzərinə düşən hər şeyi sonadək yerinə yetirəcəkdir.
Hörmətli Prezident!
Azərbaycanın Qərbin demokratik dəyərlərini mənimsəmək, Avratlantik qurumlarına inteqrasiya arzusunu var qüvvəmizlə dəstəkləyirik. Bu sahədə Azərbaycanın qət etdiyi məsafə onun dostlarını sevindirir. Ölkələrimizin yerləşdiyi mürəkkəb coğrafi məkanda sabitlik, şübhəsiz ki, böyük əhəmiyyət daşıyır. Biz inanırıq ki, demokratikləşmə daimi sabitliyin təminatçısıdır. Demokratikləşmə prosesində həm iqtidarı, həm də müxalifəti ilə birlikdə qüvvətli iradə göstərən hər bir millət bütün problemlərin öhdəsindən gələ bilər. Bu mühitin yaradılmasında iqtidar qədər müxalifətin də üzərinə müəyyən məsuliyyət düşür. Biz ürəkdən inanırıq ki, Sizin rəhbərliyiniz altında Azərbaycan bu məqsədə yetişəcəkdir. Biz Sizin bu sahədəki addımlarınızı ürəkdən dəstəkləyirik.
Möhtərəm Prezident, əziz qardaşım!
Möhtərəm xanım Əliyeva!
Bu gün bir daha Azərbaycanı öz evimiz, azərbaycanlı qardaşlarımızı isə öz ailə üzvlərimiz kimi hiss etdik. Bu duyğu və düşüncələrlə bu badəni Sizin və möhtərəm xanım Əliyevanın cansağlığı və xoşbəxtliyi, Türkiyə və Azərbaycanın rifah və əmin-amanlıq dolu gələcəyi naminə qaldırıram.
Bölmənin digər xəbərləri
